لاہور(پاکستان پوائنٹ نیوز08۔نومبر۔2018ء) لاہور دے مشہور نجی ہوٹل آواری دی زمین وی غیر قانونی نکلی۔ ریونیو اتھارٹی دے مطابق آواری ہوٹل وفاقی حکومت دی زمین اُتے بنایا گیا اے۔ تفصیل مطابق مال روڈ لاہور اُتے موجود مشہور نجی فائیو سٹار ہوٹل دی زمین بارے انکشاف ہویااے کہ اوہ غیر قانونی اے تے اوس زمین دی ملکیت حکومت کول اے۔ ریکارڈ دے مطابق مال روڈ اُتے نجی ہوٹل وفاقی حکومت دی 96کنال زمین اُتے بنایا گیا۔
دس ارب رُپئے توں ودھ مالیت دی سرکاری زمین اُتے ہوٹل بنان دیاں تحقیقات شروع کر دتیاں گئیاں نیں۔ایس حوالے نال ساہمنے آن والیاں تفصیلاں دے مطابق 1947تیکر فائیو سٹار ہوٹل دی زمین بہادر گوپال داس دے ناں سی۔ ریونیو ریکارڈ دے مطابق 1963وچ زمین وفاقی حکومت دے ناں ٹرانسفر ہوئی، اینٹی کرپشن وسیلیاں دا آکھنا اے کہ نجی ہوٹل اجے تیکر وفاقی حکومت دے ناں اے۔ اینٹی کرپشن نے ہوٹل دی زمین بارے پٹواری دی رپورٹ تے ریونیو ریکارڈ دیاں کاپیاں لے لئیاں نیں۔ ایس حوالے نال کیس دی باقاعدہ سنوائی پیر نوں اینٹی کرپشن پنجاب وچ ہوئے گی۔
