اسلام آباد(پاکستان پوائنٹ نیوز08۔نومبر۔2018ء) وزیر اعظم عمران خان نے اپوزیشن خلاف تقریراں اُتے پابندی لا دتی۔ وزیر اعظم دا آکھنا اے کہ حکومتی ارکان نوں تقریر کرن توں پہلاں وزیر دفاع پرویز خٹک کولوں اجازت لینی پئے گی۔ تفصیل مطابق پچھلے دیہاڑے پارلیمنٹ وچ ہنگامہ ہویا۔ جیہدی وجہ توں اپوزیشن تے حکومت وچکار جھیڑا پیدا ہو گیا۔یاد رہوے کہ کُجھ دن پہلاں حکومت نوں ڈاڈھی تنقید دا نشانہ بناندے ہوئے لیگی رہنما احسن اقبال نے آکھیا کہ اسیں دہشت گرداں دیاں اکھاں وچ اکھاں پاکے گل کیتی۔
اندھیرے دور کیتے۔ وزیر اطلاعات جدوں گل کردے، اپوزیشن نوں ڈاکو چور آکھدے نیں۔ اسیں نہیں تے تُسیں لوک چور تے ڈاکو او۔ اوہناں نے ہور آکھیا کہ وزیراعظم باہر جاکے وی کنٹینر والی تقریر کردے نیں۔ جیہدے مگروں حکومتی ارکان ولوں وی بیان بازی کیتی گئی، تے ایس دوران ماحول گرم رہیا۔ پر ہن ایس حوالے نال وزیر اعظم عمران خان نے حکومتی ارکان اُتے پابندی لا دتی اے کہ اوہ اپوزیشن ولوں کیتیاں گئیاں تقریراں اُتے سخت ردعمل نہ دین تے نہ ای اپوزیشن خلاف تقریراں کرن۔ وزیر اعظم عمران خان نے حکومتی ارکان دی تقریر نوں وزیر دفاع دی اجازت نال مشروط کر دتا۔ وزیر اعظم دا کہنا سی کہ حکومتی ارکان نوں تقریر توں پہلاں وزیر دفاع پرویز خٹک کولوں اجازت لینی پئے گی۔
