لاہور(پاکستان پوائنٹ نیوز08۔نومبر۔2018ء) پنجاب اسمبلی وچ اپوزیشن لیڈر حمزہ شہباز نے عمران خان نوں نیب دا ’بغل بچہ‘ قرار دے دتا۔ اوہناں نے آکھیا کہ سپریم کورٹ دے ججاں نے نیب نوں سیاست زدہ قرار دتا، سپریم کورٹ وچ نیب نوں جرمانہ کیتا جاندا اے، ساڈے کولوں غلطی ہوئی جو نیب دا کالا قانون ختم نہیں کیتا۔ مسلم لیگ (ن) دے رہنما حمزہ شہباز شریف نے پنجاب اسمبلی وچ میڈیا نال گل بات کردے ہوئے آکھیا کہ کل ٹی وی چینلز اُتے نیب اپنیاں صفائیاں پیش کر رہیا سی۔
اوہناں نے آکھیا کہ نیب دا دوہرا معیار اے۔ شہباز شریف نوں صاف پانی وچ سد کے آشیانہ وچ گرفتار کیتا جاندا اے۔ شہباز شریف نوں 30دن ہو گئے نیں پر شہباز شریف خلاف اک پائی دی کرپشن وی ثابت نہیں ہو سکی۔ جیہنے صوبے دی خدمت کیتی اوہنوں گرفتار کر لیاجاندا اے۔ سپریم کورٹ ججاں نے نیب نوں سیاست زدہ قرار دتا۔ وزیر اعظم دی اپنی کابینہ وچ نیب زدہ شامل نیں۔
عمران خان آپ وی سرکاری ہیلی کاپٹر کیس وچ پیشیاں بھگت چکے نیں۔اوہناں دا آکھنا سی کہ سپریم کورٹ وچ نیب نوں جرمانہ کیتا جاندا اے۔ عدالت پُچھدی اے کہ کوئی کرپشن ثابت ہوئی تے جواب ملدا اے کہ تفتیش ہو رہی اے۔ اوہناں نے وزیر اعظم نوں تنقید دا نشانہ بناندے ہوئے آکھیا کہ تُسیں چار ووٹاں نال وزیر اعظم بنے۔حمزہ شہباز شریف دا آکھنا سی کہ یوٹرن لین اُتے قوم عمران خان دا محاسبہ کرے گی۔ اوہناں نوں ہن لُکن دی تھاں نہیں ملے گی۔ عمران خان 50لکھ گھر بنان دا دعوا کر کے پھس گئے۔
