لاہور(پاکستان پوائنٹ نیوز08۔نومبر۔2018ء) لاہور ہائی کورٹ نے وزیر اعظم عمران خان دی این اے 95میانوالی توں نااہلی لئی دائر انتخابی عذرداری اُتے فیصلا محفوظ کر لیا۔ لاہور ہائی کورٹ دے مسٹر جسٹس شاہد وحید اُتے مشتمل الیکشن ٹربیونل نے عبدالوہاب بلوچ دی انتخابی عذرداری اُتے سنوائی کیتی۔ سنوائی دوران وزیر اعظم عمران خان دے وکیل نے اعتراض چُکیا کہ انتخابی عذرداری سنوائی دے قابل نہیں۔
عذرداری نوں دائر کردے ہوئے درخاست گزار نے قانونی تقاضے پورے نہیں کیتے۔ انتخابی عذرداری متھے ویلے مگروں دائر کیتی گئی جو سنوائی دے قابل نہیں اے۔ ہور موقف اپنایا گیا کہ انتخابی عذرداری دی تصدیق لاہور دی بجائے اسلام آباد دے اوتھ کمشنر کولوں کروائی گئی۔ درخاست گزار کراچی دا واسی اے اوہ کس طرحاں لاہور ہائی کورٹ وچ درخاست دے سکدا اے۔ بابر اعوان نے آکھیا کہ درخاست گزار نے انتخابی عذرداری نال جھوٹھا بیان حلفی لایا۔ درخاست گزار نے آکھیا کہ عمران خان نے اپنے کاغذات نامزدگی وچ اپنے بالاں بارے ساریاں معلومات نہیں دتیاں۔
