وزیر اعظم عمران خان دی یمنی سفیر نال ملاقات

پاکستان یمن مسئلے دے سیاسی تے پرامن حل لئی اپنا کردار نبھائے گا:وزیر اعظم عمران خان

وزیر اعظم عمران خان دی یمنی سفیر نال ملاقات
پاکستان یمن مسئلے دے سیاسی تے پرامن حل لئی اپنا کردار نبھائے گا:وزیر اعظم عمران خان

اسلام آباد(پاکستان پوائنٹ نیوز07۔نومبر۔2018ء) وزیراعظم عمران خان نے یمن دے سفیر نال ملاقات وچ اک وار فیر آفر کیتی اے کہ پاکستان یمن مسئلے دے سیاسی تے پرامن حل لئی اپنا کردار نبھائے گا۔ تفصیل مطابق وزیر اعظم نے یمنی سفیر محمد مطاہر الشبی نال ملاقات کیتی اے۔ وزیر اعظم نے یمنی قیادت دے ناں پیغام وچ یمنی بحران دے چھیتی خاتمے لئی نیک خاہشاں دا اظہار کیتا۔

یمنی سفیر نے پاکستان دی ترقی و خشحالی لئی نیک خاہشاں دا سنیہا وی اپڑایا۔ وزیر اعظم عمران خان دا آکھنا سی کہ یمن بحران دا خاتمہ عالمی و خطے دی سلامتی دی کُنجی اے۔ پاکستان اقوام متحدہ دیاں قرارداداں دے مطابق مسئلے دے چھیتی حل دا حامی اے۔ پاکستان یمن مسئلے دے سیاسی و پرامن حل لئی اپنا کردار نبھائے گا۔ یمن مسئلے دا کوئی فوجی حل نہیں اے۔

یاد رہوے کہ ایس پہلاں 3نومبر نوں خبر ساہمنے آئی سی کہ پاکستان یمن جھیڑے دے سارے فریقاں تے متعلقہ ملکاں نوں اک میز اُتے لیانا چاہندا اے۔ وڈی پدھر(اعلی سطحی) دے مذاکرات اُتے رضا مندی مگروں یمن تے امن روڈ میپ لئی تجویزاں منگیاں جان گیاں۔ پاکستان یمن وچ دیرپا امن، خطے وچ ترقی لئی تعاون ودھانا چاہندا اے۔ سفارتی وسیلیاں مطابق وزیر اعظم عمران خان دے دورہ سعودی عرب وچ آفر بارے سعودی قیادت نوں دسیا گیا سی جدکہ ایرانی وزیر خارجا دے دورہ پاکستان وچ آفر کیتی گئی جیہدا ایران ولوں مثبت جواب دتا گیا، سعودی جواب دی اُڈیک اے۔

یمنی حکومت تے مخالف دھڑیاں نال رابطے دی کوشش کیتی جا رہی اے۔ سعودی عرب تے ایران نے وڈی پدھر اُتے صلاح لئی ویلا منگ لیا اے۔ پاکستان یمن جھیڑے دے سارے فریقاں تے متعلقہ ملکاں نوں اک میز اُتے لیانا چاہندا اے۔