لاہور(پاکستان پوائنٹ نیوز07۔نومبر۔2018ء) مسلم لیگ (ن) دے صدر و سابق وزیر اعلا پنجاب میاں شہباز شریف نے لاہور نوں پیرس بنان دے اپنے خاب نوں بار بار دوہرایا جیہدے اُتے اوہناں نوں کئی وار تنقید دا نشانہ وی بنایا گیا ۔ خاص کر بارشاں دے موسم وچ لاہور اندر پانی جمع ہون دی وجہ توں اوہناں دا ڈاڈھا مذاق وی اُڈایا گیا۔ پر ہن نویں حکومت نے انج دے ای کئی وعدے کرنے شروع کر دتے نیں جیہناں اُتے عملدرآمد تیکر لوکائی نویں حکومت دا وی یقین نہیں کرے گا۔
اطلاع مطابق پاکستان تحریک انصاف دی حکومت نے لاہور نوں دبئی بنان دا اعلان کر دتا اے۔ جیہدے لئی لاہور وچ وی دبئی تے یورپی ملکاں وانگ 30توں 40منزلہ بلڈنگاں بنائیاں جان گیاں۔ سینئر صوبائی وزیر عبدالعلیم خان نے ایل ڈی اے نوں نواں ماسٹر پلان تے ڈاؤن ٹاؤن بنان دی ہدایت کیتی اے۔ ایس حوالے نال گل بات کردے ہوئے سینئر وزیر علیم خان دا آکھنا سی کہ ہن ویلا آ گیا اے کہ دبئی تے یورپی ملکاں وانگ لاہور وچ وی ہائی رائز بلڈنگاں بنان دی اجازت دتی جائے۔
علیم خان نے آکھیا کہ سانوں ویکھنا پئے گا کہ آؤندے کُجھ سالاں وچ اسیں لاہور شہر نوں کس مقام اُتے ویکھنا چاہندے آں۔ شہر دا ڈاؤن ٹاؤن ایریا تے کمرشل ایریا کتھے ہوئے گا۔رہائشی علاقہ کیہڑا ہوئے گا۔ زراعت لئی کیہڑا علاقہ رکھیا جائے گا۔ شہر وچ انڈسٹریل زونز کتھے بنن گے۔ رنگ روڈ کتھے آئے گی۔ ایکسپرس ویز کتھوں کڈھاں گے۔ ایہ ساریاں شیواں ہن ڈیزائن ہونیاں چاہیدیاں۔
