اسلام آباد(پاکستان پوائنٹ نیوز07۔نومبر۔2018ء) حکومت ولوں عافیہ صدیقی دی رہائی لئی ٹھوس اقدامات کرن دا فیصلا کر لیا گیا اے۔ وزیر خارجا شاہ محمود قریشی آؤندے ہفتے ڈاکٹر فوزیہ صدیقی نال ملاقات کرن گے۔ تفصیل مطابق قوم دی دھی ڈاکٹر عافیہ نوں امریکی حراست وچ 5700دن ہو گئے نیں۔ اوہناں دی امریکی جیل توں رہائی تے ملک واپسی لئی اندرون و بیرون ملک کوششاں تے خاص کر دعاواں دا سلسلا جاری اے۔
ڈاکٹر عافیہ دی بھین ڈاکٹر فوزیہ صدیقی نے اج میڈیا نال گل بات کردے ہوئے آکھیاکہ عافیہ دی واپسی بارے قوم تے عافیہ دی فیملی نوں وزیر اعظم عمران خان توں بہت آساں نیں۔ تاریخ اک وار فیر اپنے آپ نوں دُہرا رہی اے۔ اوہناں دا آکھنا سی کہ ڈاکٹر عافیہ دی والدہ عصمت صدیقی اک وار فیر بیمار نیں تے اوہناں دی صحت اک ہور دھوکا برداشت کرن دے قابل نہیں اے۔
قوم توں اوہناں دی تندرستی، عافیہ دی چھیتی رہائی تے ملاپ لئی دعاواں دی اپیل اے۔ پر ہن ایس حوالے نال تازہ ترین خبر ایہ اے کہ وزیر خارجا شاہ محمود قریشی آؤندے ہفتے ڈاکٹر فوزیہ صدیقی نال ملاقات کرن گے۔ پاکستان دا ایس معاملے اُتے اصولی موقف اے کہ عافیہ صدیقی بارے سارے بنیادی حقاں نوں مُکھ رکھیا جائے۔ دوجے پاسے پاکستان نے عافیہ صدیقی دے حوالے نال تحقیقات اُتے امریکا نوں دس دتا۔ پاکستان نے ایلس ویلز دے دورے دوران عافیہ صدیقی دے معاملے نوں ساہمنے رکھیا۔
