لاہور(پاکستان پوائنٹ نیوز06۔نومبر۔2018ء) وزیراعظم عمران خان دا قوم نال اج خطاب منسوخ ہوگیا، وزیر اعظم عمران خان نے قوم نال 8وجے خطاب کرنا سی۔ میڈیا رپورٹس مطابق وزیر اعظم عمران خان نے قوم نال خطاب نہ کرن دا فیصلا کر لیا اے۔ جیہدے مگروں وزیر اعظم عمران خان دا خطاب منسوخ کر دتا گیا اے۔ وزیر اعظم عمران خان دا خطاب ریکارڈ کرن والی سرکاری ٹیم نوں واپس گھل دتا گیا اے۔
دوجے پاسے وزیر اعظم عمران خان دی صدارت ہیٹھ قومی سلامتی کمیٹی دے اجلاس وچ وزیر خزانہ اسد عمر، وزیر خارجا شاہ محمود قریشی، وزیر مملکت برائے داخلا شہریار آفریدی تے وزیر اطلاعات فوادی چودھری تے قومی سلامتی دے اداریاں دے سربراہواں جیہناں وچ آرمی چیف جنرل قمر جاوید باجوہ، چیئرمین جوائنٹ چیف آف سٹاف کمیٹی جنرل زبیر محمود حیات، سربراہ پاک بحریہ ایڈمرل ظفر محمود عباسی، پاک فضائیہ دے سربراہ ائر چیف مارشل مجاہد انور خان ،ڈی جی آئی ایس آئی لیفٹیننٹ جنرل عاصم منیر، ڈی جی ایم آئی تے ڈی جی آئی ایس پی آر سنے ہور حکام رلتی ہوئے۔
اجلاس تن گھنٹے جاری رہیا۔ اعلامیے مطابق اجلاس وچ ملکی سلامتی تے داخلی صورتحال بارے وچار وٹاندرا کیتا گیا۔ایس موقعے تے وزیر اعظم نے چینی دورے بارے کمیٹی ارکان نوں دسیا۔ وزیر اعظم نے چینی صدر تے روسی وزیر اعظم نال ملاقاتاں بارے وی کمیٹی نوں اعتماد وچ لیا۔ اجلاس وچ سی پیک منصوبیاں دی سکیورٹی دے معاملات وی غور ہیٹھ آئے۔اجلاس دوران سپریم کورٹ دے آسیہ بی بی دی رہائی دے فیصلے مگروں پرتشدد احتجاج تے اوہدے نتیجے وچ پیدا ہون والی صورتحال دا وی جائزہ لیا گیا۔
اجلاس توں پہلاں اعظم عمران خان تے آرمی چیف جنرل قمر جاوید وچکار ملاقات وی ہوئی۔ ملاقات وزیر اعظم ہاؤس وچ ہوئی۔ ملاقات دوران سکیورٹی صورتحال بارے گل بات کیتی گئی۔ وزیر اعظم عمران خان نے آرمی چیف نوں چین دے دورے اُتے اعتماد وچ وی لیا۔وزیر اعظم تے چیف آف آرمی سٹاف جنرل قمر جاوید باجوہ وچکار ملاقات قومی سلامتی دے اجلاس توں پہلاں ہوئی۔
