اسلام آباد(پاکستان پوائنٹ نیوز06۔نومبر۔2018ء) ’نیا پاکستان ہاؤسنگ‘ منصوبے دے امیدواراں نوں کل لاگت دا 20فیصد ڈاؤن پے منٹ دے طور اُتے دینا پئے گا۔ تفصیل مطابق اقتدار وچ آن توں پہلاں پاکستان تحریک انصاف نے غریب لوکاں لئی گھر بنان دے وعدے نوں اپنے منشور وچ وی شامل کیتا ،جیہدے مگروں عمران خان نے وزارت اعظمی دا عہدہ سنبھالن دے دو مہینیاں مگروں ای ’نیا پاکستان ہاؤسنگ سکیم‘ منصوبے دی نیہہ رکھی۔
ایس منصوبے دے بہت چرچے ہون لگے ۔ پر ہن امیدواراں ولوں درخاستاں جمع ہون دے بعد حکومت نے ایہ اعلان کیتا اے کہ امیدواراں نوں اپنے گھر دی کل لاگت دا 20فیصد بطور ڈاؤن پے منٹ جمع کروانا پئے گا۔ جدکہ باقی 80فیصد پیسے حکومت ولوں دتے جان گے۔ ایہناں خیالاں دا اظہار پاکستان تحریک انصاف دے رہنما فردوس شمیم نقوی نے صوبائی وزیر برائے ہاؤسنگ میاں محمود الرشید تے ہاؤسنگ منصوبے اُتے بنائی گئی ٹاسک فورس دے چیئرمین زیغم رضوی نال سانجھی پریس کانفرنس نال خطاب کردے ہوئے کیتا۔ یاد رہوے کہ ایہ پہلی وار اے کہ حکومت ولوں 20فیصد ڈاؤن پے منٹ بارے کوئی اعلان کیتا گیا اے۔ کیونکہ ایس توں پہلاں حکومت ولوں ہاؤسنگ منصوبے بارے ایس طرحاں دی کوئی گل نہیں کیتی گئی۔
