کراچی(پاکستان پوائنٹ نیوز05۔نومبر۔2018ء) دنیا دے طاقت ور ترین پاسپورٹ دا اعزاز سنگاپور تے جرمنی نے اپنے ناں کر لیااے جدکہ پاکستان 8درجے بہتری نال 90ویں نمبر اُتے آ گیا۔تفصیل مطابق پاسپورٹ انڈیکس ولوں جاری کیتی گئی رپورٹ دے مطابق دنیا دے طاقتور ترین پاسپورٹ دا اعلان کر دتا گیا اے۔ سنگاپور تے جرمنی نے ایس لسٹ وچ پہلی پوزیشن لے لئی اے۔ پاکستان 90ویں تے بھارت 66ویں نمبر اُتے آ گیا اے۔
سال 2018دی پاسپورٹ انڈیکس رپورٹ دے مطابق 165ملکاں دی لسٹ وچ پاکستان تے عراق دا 90واں نمبر اے۔ افغانستان91ویں،شام 88ویں، صومالیہ87 تے بھارت 66ویں نمبر اُتے اے۔ پاکستانی پاسپورٹ دی عالمی رینکنگ وچ بہتری ویکھی گئی اے۔ پچھلے سال دی رپورٹ دے مطابق پاکستان دا 98واں نمبر سی پر ایس وار پاکستان 90ویں نمبر اُتے اے۔ یاد رہوے کہ ایس رپورٹ وچ دنیا بھر دے ملکاں دے پاسپورٹاں نوں سفر دی آزادی دے لحاظ نال ترتیب دتا گیا اے۔ یعنی پاسپورٹ رکھن والا بندہ بغیر ویزے دے کِنے ملک پھر سکدا اے۔
