نوشہرہ(پاکستان پوائنٹ نیوز05۔نومبر۔2018ء) اج کل ویاہ دی تقریب وچ جِنا اہتمام کیتا جائے اونا ای گھٹ ہوندا اے پر نوشہرہ وچ ہون والی اک ویاہ دی تقریب وچ سادے پن دی وڈی مثال ویکھن نوں ملی جتھے ولیمے دی تقریب وچ کسے نوں نہیں سدیا گیا بلکہ روٹی ڈبیاں وچ پیک کر کے گھر گھر ونڈی گئی۔ تفصیل مطابق نوشہرہ وچ شہری نے ولیمے دی دعوت دا کھانا پورے پنڈ وچ گھر گھر ونڈ ن دی نویں ریت شروع کیتی۔
حاجی ناہید نے اپنے پُتر دے ولیمے دی تقریب و چ پورے پنڈ وچوں کسے نوں دعوت نہ دتی بلکہ اپنے گھر وچ اپنے پُتر دے ولیمے دا کھانا پکا کے ڈبیاں وچ بند کر کے اپنے رشتے داریاں دی مدد نال پنڈ دے ہر گھر اپڑایا۔ پنڈ والے گھراں وچ ای دعوت دی روٹی کھا کے خُش ہو گئے۔ دوجے پاسے حاجی ناہید دا آکھنا سی کہ ویاہواں دا موسم اے۔ پِنڈ وچ ہر ایتوار نوں چار پنج ویاہ ہو رہے نیں۔ کسے کول جان دا ویلا نہیں ہوندا پر جے روٹی کھان لئی کوئی آ وی جائے تے سارے روٹی چھڈ دیندے نیں۔ ایہدا حل میں کُجھ ایس طرحاں کڈھیا کہ میں ڈبے منگوائے تے پورے پنڈ دے بندیاں دی اک لسٹ بنا کے ہر گھرڈبے اپڑا دتے۔
