لاہور(پاکستان پوائنٹ نیوز05۔نومبر۔2018ء) مشہور پرچاکار رؤف کلاسرا دا آکھنا اے کہ ایہ گل من لینے آں کہ وزیراعظم نوں اپنی ساری کابینہ نوں لے کے ٹُرنا ہوندا اے پر شہریار آفریدی تے اعظم سواتی عمران خان دے اپنے بندے نیں اوہناں نوں تے سمجھایا جا سکدااے ۔ گھٹو گھٹ اوہناں لوکاں نوں تے عمران خان نوں شرمندہ نہیں کروانا چاہیدا۔ جے پرویز الہی عمران خان لئی کوئی شرمندگی دا سامان پیدا کرن تے آکھیا جا سکدا اے کہ ایہ تے تحریک انصاف دے اتحادی نیں پر عمران خان کولوں اپنے وزیرنہیں سنبھالے جا رہے۔
اعظم سواتی دا مسئلا اینا نہیں سی نہیں جِنا ودھایا گیا۔ غریب لوکاں نوں جیل اندر کروا دتا تے فیر باقی وزیراں نے وی اوہناں دا ساتھ دتا۔ پر ایس طرحاں دے فیصلے مگروں بعد وچ اوکڑاں پیدا کرن گے۔ رؤف کلاسرا دا کہنا سی کہ سیکرٹری داخلا نے اک ہور کم کیتا کہ عمران خان تے شہریار آفریدی دی وٹس ایپ اُتے گل بات دا سکرین شاٹ سپریم کورٹ وچ وکھایا ، ہن ایہ نہیں پتا کہ اوہناں نے ایس کم دی اجازت عمران خان کولوں لئی سی یاں نہیں۔
رؤف کلاسرا دا ہور آکھنا سی کہ کیہ حکومتاں وٹس ایپ اُتے چلن گیاں کیہ اینے وڈے وڈے فیصلے صرف وٹس ایپ اُتے ہون گے۔ مینوں نہیں پتا چیف جسٹس آف پاکستان ایہدے اُتے کیہ ردعمل دین گے۔ پر مریم نواز تے چودھری نثار دی لڑائی وی ایس طرحاں ٹویٹر اُتے شروع ہوئی سی تے سیکرٹری داخلا نے ایہ کم کر کے عمران خان دا سر شرم نال جُھکا دتا اے۔
