لاہور(پاکستان پوائنٹ نیوز03۔نومبر۔2018ء) جمعیت علماء اسلام (س) دے سربراہ شہید مولانا سمیع الحق دے قتل دیاں تحقیقات لئی ایمبولینس عملے نوں وی تفتیش وچ شامل کرن دا فیصلا کر لیا گیا اے۔ ایمبولینس عملے دا آکھنا اے کہ اوہناں نوں مولانا سمیع الحق نے آپ فون کر کے سدیا سی۔دوجے پاسے اوہناں دے ذاتی ملازماں نے وی پولیس نوں بیان ریکارڈ کروا دتااے۔
ملازماں نے انکشاف کیتا کہ مولانا سمیع الحق نوں 2بندے ملن آئے سن، دوناں نے مولانا سمیع الحق نال اکلے گل بات کرن دا آکھیا ، جیہدے اُتے مولانا نے سانوں کھان پین دیاں شیواں لین لئی بازار گھل دتا۔ یاد رہوے کہ جمعیت علمائے اسلام (س) دے سربراہ مولانا سمیع الحق دی نماز جنازہ اکوڑہ خٹک دے کالج گراؤنڈ وچ اج پڑھی گئی۔ مولانا سمیع الحق دی نماز جنازہ اوہناں دے پُتر حامد الحق نے پڑھائی۔ نماز جنازہ وچ وزیر اعلا خیبرپختونخوا محمود خان، گورنر خیبرپختونخوا شاہ فرمان، سابق گورنر اقبال ظفر جھگڑا، مسلم لیگ (ن) دے رہنما راجا ظفر الحق ، جماعت اسلامی دے سربراہ سراج الحق، لیاقت بلوچ تے اشرف تھانوی سنے کئی سیاسی و مذہبی رہنماواں تے کارکناں دی وڈی گنتی موجود سی۔
