لاہور(پاکستان پوائنٹ نیوز03۔نومبر۔2018ء) مشہور پرچا کار چودھری غلام حسین دا آکھنا اے کہ مذاکرات کامیاب ہون مگروں دھرنا تے ختم ہو گیا اے پر اک گل نوٹ کر لوو کہ جیہڑے لوکاں نے فوج وچکار تفرقہ کھلارن دی کوشش کیتی اے، ججاں بارے گھٹیا بیان دتے،ججاں نوں دھمکیاں دتیاں تے آکھیا کہ اوہناں اُتے حملے ہونے چاہیدے۔ وزیر اعظم عمران خان اُتے وی غلیظ حملے کیتے۔
ایہناں سارے لوکاں خلاف قانونی کارروائی کیتی جائے گی۔ چودھری غلام حسین نے آکھیا جے تحریک لبیک نے ایہو سمجھوتا کرنا سی تے فیر تن دن دھرنا دین دی کیہ لوڑ سی۔ انج دے لوکاں خلاف کارروائی ہونی چاہیدی تاں جے آؤندے ویلے نوں ایہ صورتحال نہ پیدا ہوئے۔ دوجے پاسے آسیہ بی بی دی بریت دے فیصلے اُتے نظرثانی لئی سپریم کورٹ لاہور رجسٹری وچ اپیل دائر کر دتی گئی اے۔
اپیل قاری سلام نے ایڈووکیٹ اظہر صدیق تے غلام مصطفی چودھری راہیں دائر کیتی۔ اپیل وچ آکھیا گیا ا ے کہ آسیہ بی بی نے تفتیش دوران جرم قبول کیتا۔ایف آئی آر دیر نال درج کرن دا مطلب ایہ نہیں کہ ملزم بے گناہ اے۔ اپیل وچ آکھیا گیا اے کہ سپریم کورٹ بی بی بارے بریت دے فیصلے اُتے نظرثانی کرے۔آسیہ بی بی دا ناں نظرثانی اپیل دے فیصلے تیکر ای سی ایل وچ پایا جائے۔
