چین دا پاکستان دی اقتصادی مدد کرن دا اعلان

چین دا پاکستان دی اقتصادی مدد کرن دا اعلان

بیجنگ،اسلام آباد(پاکستان پوائنٹ نیوز03۔نومبر۔2018ء) چین دے نائب وزیر خارجا کونگ ژوان نے آکھیا اے کہ اوہناں دا ملک پاکستان نوں حالیہ اقتصادی بحرانی صورتحال وچ مدد دین لئی تیار اے پر ایس سلسلے وچ ہور گل بات ضروری ہوئے گی۔ غیر ملکی خبر رساں ادارے مطابق چین ولوں ایہ اعلان پاکستانی وزیر اعظم عمران خان دی اپنے چینی ہم منصب نال ملاقات مگروں ساہمنے آیا۔

چینی نائب وزیر خارجا نے ایہ نہیں دسیا کہ بیجنگ حکومت ولوں پاکستان نوں کِنی مدد دتی جائے گی۔یاد رہوے کہ پاکستانی وزیر اعظم عمران خان چین دے دورے اُتے نیں۔ پچھلے دیہاڑے پاکستانی وزیر اعظم عمران خان نے دورہ چین دوران چینی صدر نال ملاقات کیتی۔ملاقات دوران پاک چین شراکت داری دے سارے پہلواں دا جائزہ لیا گیا تے ہر آزمائش اُتے پورا اُترن والی پاک چین دوستی ہور پکی بنان بارے گل بات کیتی گئی۔

دوناں رہنماواں وچکار خطے تے اک دوجے دے مفاد لئی شراکت داری نوں ہور پکا بنان بارے وی گل بات ہوئی۔ ملاقات مگروں وزیر اعظم عمران خان تے چینی صدر وچکار وفود دی سطح اُتے گل بات ہوئی۔ پاکستانی وفد وچ وزیر خزانہ اسدعمر، وزیر خارجا شاہ محمود قریشی، منصوبہ بندی، ریلوے دے وزیر تے وزیر اعلا بلوچستان جام کمال شامل نیں۔ چینی صدر نال ملاقات دوران وزیر اعظم پاکستان نے چینی صدر نوں پاکستان دے دورے دی دعوت دتی۔

چینی صدر نے پاکستان دے دورے دی دعوت قبول کیتی۔ وزیر اعظم عمران خان تے چینی صدر وچکار ملاقات دوران دو پاسی تعلقات دا جائزہ لیا گیا۔ چینی صدر نے عمران خان نوں الیکشن وچ جِت اُتے مبارکباد تی۔ عمران نے آکھیا کہ چینی دوستی پاکستان دی خارجا پالیسی دی بنیاد اے۔چین نے جِنی ترقی کیتی اے پاکستان اوہدے توں بہت متاثر اے۔ کرپشن تے غربت وچ کمی لئی پاکستان چین دے تجربے توں سکھنا چاہندا اے۔

چینی صدر نے آکھیا کہ چین سیاسی و معاشی پور اُتے پاکستان دی مدد کرے گا۔ چین نے اقتصادی بحران وچ وی پاکستان نوں مشکل توں کڈھن لئی تعاون دی یقین دہانی کروائی اے۔ایس موقعے تے چین ولوں پاکستان نوں سی پیک دی مد وچ تن ارب ڈالر ہور گرانٹ ملن دا امکان اے۔ مجموعی طور اُتے چین ولوں چھ ارب ڈالر ملن دا امکان اے جیہدے وچ ڈیڈھ ارب ڈالر قرض تے ڈیڈھ ارب ڈالر امداد وی شامل اے۔