اسلام آباد(پاکستان پوائنٹ نیوز03۔نومبر۔2018ء) سپریم کورٹ ولوں آسیہ بی بی دے فیصلے خلاف تن دن ملک بھر وچ احتجاج دا سلسلا جاری رہیا، خاص کر پنجاب وچ امن و امان دی صورتحال خراب رہی، احتجاج کرن والیاں ولوں پتھر رکھ کے تے ٹائر ساڑ کے سڑکاں بند کیتیاں گئیاں،جیہدے نتیجے وچ لوکاں نوں اوکڑاں دا ساہمنا کرنا پیا۔ انج دے ماحول وچ سوشل میڈیا اُتے احتجاج دیاں کئی ویڈیوز وائرل ہوئیاں پر پچھلے دیہاڑے کُجھ بالاں دی اک ویڈیو وائرل ہوئی جیہنے سوشل میڈیا ورتیندڑاں دے دل جت لئے۔ ویڈیو وچ ویکھیا گیا کہ نِکے بال سڑک بند کرن لئی رکھے گئے وٹے چُک کے راہ کھول رہے نیں تاں جے لوکاں نوں ہور اوکڑاں دا ساہمنا نہ کرنا پئے۔ سوشل میڈیا اُتے ایہناں بالاں دی ویڈیو وائرل ہوئی تے ورتیندڑاں(صارفین) نے ایہناں بالاں نوں سچا عاشق رسول قرار دے دتا۔
لوکاں دا آکھنا اے کہ ایہو بال سچے عاشق رسول نیں جو لوکاں لئی آسانی پیدا کر رہے نیں تے بند راہ کھول رہے نیں۔یاد رہوے کہ کل رات حکومت نال سمجھوتے مگروں تحریک لبیک ولوں احتجاج دا سلسلا ختم ہوگیا اے۔
