لاہور(پاکستان پوائنٹ نیوز03۔نومبر۔2018ء) آسیہ بی بی دے وکیل نے ملک چھڈن دا فیصلا کر لیا۔ میڈیا رپورٹس مطابق آسیہ بی بی دے وکیل سیف الملوک دا آکھنا اے کہ میری زندگی نوں خطرہ اے ایس لئی میں پاکستان چھڈن دا فیصلا کر لیا اے۔ سیف الملوک دا کہنا سی کہ جے آرمی اوہناں نوں سکیورٹی دیوے تے اوہ آسیہ بی بی کیس خلاف دائر کیتی گئی نظرثانی دی اپیل وچ پاکستان واپس آن گے تے آسیہ بی بی دی نمائندگی کرن گے۔
آسیہ بی بی دے وکیل دا ہور آکھنا سی کہ میرے گھر والیاں دی جان نوں خطرہ اے، ایس لئی وفاقی حکومت اوہناں نوں سکیورٹی دیوے۔دوجے پاسے آسیہ بی بی دی بریت دے فیصلے اُتے نظرثانی لئی سپریم کورٹ لاہور رجسٹری وچ اپیل دائر کر دتی گئی اے۔ اپیل قاری سلام نے ایڈووکیٹ اظہر صدیق تے غلام مصطفی چودھری راہیں دائر کیتی۔ اپیل وچ آکھیا گیا ا ے کہ آسیہ بی بی نے تفتیش دوران جرم قبول کیتا۔ایف آئی آر دیر نال درج کرن دا مطلب ایہ نہیں کہ ملزم بے گناہ اے۔ اپیل وچ آکھیا گیا اے کہ سپریم کورٹ بی بی بارے بریت دے فیصلے اُتے نظرثانی کرے۔آسیہ بی بی دا ناں نظرثانی اپیل دے فیصلے تیکر ای سی ایل وچ پایا جائے۔
