اسلام آباد(پاکستان پوائنٹ نیوز02۔نومبر۔2018ء) مولانا سمیع الحق دے قتل اُتے وزیر اعظم عمران خان تے ہور سیاسی رہنماواں ولوں دُکھ دا اظہار کیتا گیا اے، وزیر اعظم نوں چائنہ وچ مولانا دے قتل دی خبر دتی گئی۔ تفصیل مطابق جمعیت علماء اسلام (س) دے سربراہ مولانا سمیع الحق قاتلانہ حملے وچ ہلاک ہو گئے۔ شرپسند عناصر نے سربراہ جے یو آئی (س) مولانا سمیع الحق اُتے چاقو نال حملا کیتا ۔
حملے دے نتیجے وچ اوہ ڈاڈھے زخمی ہو گئے ، جتھوں اوہناں نوں ہسپتال منتقل کیتا گیا پر ڈاڈھے زخماں پاروں اوہ ہلاک ہوگئے۔ مولانا دے ہلاک ہون دی تصدیق جے یو آئی (س) پشاور دے صدر مولانا حصیم نے کیتی۔ ایس حوالے نال اوہناں دے پُترمولانا حامد الحق دا آکھنا اے کہ راہ بند سن تے مولانا اسلام آباد دے وکھالے (مظاہرے)وچ نہ اپڑ سکے۔ اوہ عصر ویلے اپنے کمرے وچ آرام کر رہے سن۔
اوہناں دے ڈرائیور مولانا سید احمد شاہ حقانی باہر گئے سن، پر جدوں اوہ واپس آئے تے مولانا صاحب خون نال بھرے پئے سن۔دوجے پاسے وزیر اعظم پاکستان سنے شہباز شریف، نواز شریف، آصف علی زرداری، بلاول بھٹو زرداری، مولانا فضل الرحمان، سراج الحق تے ہور سیاسی رہنماواں ولوں مولانا دی موت اُتے دُکھ دا اظہار کیتا جا رہیا اے۔ وزیر اعظم عمران خان نوں چائنہ وچ اوہناں دے قتل دی خبر دتی گئی۔ یاد رہوے کہ وزیر اعظم عمران خان چین دے سرکاری دورے اُتے نیں۔
