اسلام آباد(پاکستان پوائنٹ نیوز02۔نومبر۔2018ء) مقتول گورنر پنجاب سلمان تاثیر دے پُتر شان تاثیر نے آسیہ بی بی دے کینیڈا جان دے بیان نوں رد کر دتا۔ تفصیل مطابق توہین رسالت دے مقدمے وچ قید آسیہ بی بی نوں عدالت ولوں رہا کرن دا حکم دتا گیا۔جیہدا چیف جسٹس دی سربراہی وچ تن رکنی بنچ نے فیصلا سُنایا۔ جسٹس آصف سعید کھوسہ تے جسٹس مظہر عالم خان وی بنچ دا حصہ سن۔
سپریم کورٹ نے لاہور ہائی کورٹ دا فیصلا کالعدم قرار دیند ے ہوئے آسیہ بی بی نوں الزام توں بر ی تے رہا کرن دا حکم جاری کیتا۔جیہدے مگروں ملک بھر وچ وکھالے شروع ہو گئے۔ایس صورتحال مگروں ایہ گل کیتی جا رہی سی کہ آسیہ بی بی باہرلے ملک چلی جائے گی۔ اج آسیہ بی بی دے بھرا جیمز مسیح دا آکھنا سی کہ آسیہ بی بی پاکستان وچ محفوظ نہیں اے۔ آسیہ بی بی کول ملک چھڈن توں وکھ کوئی ہور دوجا راہ نہیں اے۔
جیمز مسیح دا آکھنا سی کہ اجے اوہ اوس ملک دا نہیں دس سکدا جتھے آسیہ بی بی نوں لیجایا جائے گا پر سپین تے فرانس نے آسیہ بی بی نوں پناہ دین دی آفر کیتی اے۔ جیمز مسیح نے ہور دسیا کہ آسیہ بی بی دا شوہر عاشق مسیح اکتوبر وچ ای اپنے بالاں نال برطانیہ توں واپس آیا تے اوہ آسیہ بی بی دی رہائی دی اُڈیک وچ سی۔ پر ذکر کیتے گئے خاندان نوں سپریم کورٹ توں آن والے فیصلے مگروں ملک وچ پیدا ہون والی صورتحال نوں مُکھ رکھدے ہوئے لُکا کے رکھیا گیا اے۔
عاشق مسیح نے آکھیا کہ عدالت دے شکر گزار آں کہ اوہنے سانوں انسان سمجھدے ہوئے عقیدے تے مذہب دے فرق دے بغیر انصاف دتا۔ایس دوران ایہ خبراں آئیاں کہ آسیہ بی بی نوں کینیڈا منتقل کر دتا گیا اے۔ گل بخاری دے ایس ٹویٹ مگروں اک نویں بحث چھڑ گئی پر جس سابق مقتول گورنر پنجاب دے پُتر شان تاثیر نال ایہ خبر جوڑی جا رہی سی اوہناں نے آپ ایہنوں رد کر دتا اے۔ شان تاثیر دا آکھنا سی کہ آسیہ بی بی اجے پاکستان وچ اے تے سرکاری حفاظتی تحویل وچ اے۔
