سی پیک لئی 3ارب ڈالر ملن دا امکان

چین ولوں مجموعی طور اُتے 6ارب ڈالر دتے جان گے، جیہدے وچ ڈیڈھ ارب ڈالر قرض تے ڈیڈھ ارب ڈالر امداد وی شامل اے

سی پیک لئی 3ارب ڈالر ملن دا امکان
چین ولوں مجموعی طور اُتے 6ارب ڈالر دتے جان گے، جیہدے وچ ڈیڈھ ارب ڈالر قرض تے ڈیڈھ ارب ڈالر امداد وی شامل اے

اسلام آباد(پاکستان پوائنٹ نیوز02۔نومبر۔2018ء) چین ولوں پاکستان نوں سی پیک دی مد وچ تن ارب ڈالر ہور گرانٹ ملن دا امکان اے، مجموعی طور اُتے چین ولوں چھ ارب ڈالر ملن دا امکان اے جیہدے وچ ڈیڈھ ارب ڈالر قرض تے ڈیڈھ ارب ڈالر امداد وی شامل اے۔میڈیا رپورٹس مطابق پاکستانی وزیر اعظم عمران خان نے دورہ چین دوران چینی صدر نال ملاقات کیتی۔ملاقات دوران پاک چین شراکت داری دے سارے پہلواں دا جائزہ لیا گیا تے ہر آزمائش اُتے پورا اُترن والی پاک چین دوستی ہور پکی بنان بارے گل بات کیتی گئی۔

دوناں رہنماواں وچکار خطے تے اک دوجے دے مفاد لئی شراکت داری نوں ہور پکا بنان بارے وی گل بات ہوئی۔ ملاقات مگروں وزیر اعظم عمران خان تے چینی صدر وچکار وفود دی سطح اُتے گل بات ہوئی۔ پاکستانی وفد وچ وزیر خزانہ اسدعمر، وزیر خارجا شاہ محمود قریشی، منصوبہ بندی، ریلوے دے وزیر تے وزیر اعلا بلوچستان جام کمال شامل نیں۔ وزیر اعظم نال ایشین انفراسٹرکچر انویسٹمنٹ بنک دے صدر وی ملاقات ہوئے گی۔

ملاقات دوران اقتصادی تعاون و معاشی ترقی بارے گل بات ہوئے گی۔چینی صدر نال ملاقات دوران وزیر اعظم پاکستان نے چینی صدر نوں پاکستان دے دورے دی دعوت دتی۔ چینی صدر نے پاکستان دے دورے دی دعوت قبول کیتی۔ وزیر اعظم عمران خان تے چینی صدر وچکار ملاقات دوران دو پاسی تعلقات دا جائزہ لیا گیا۔ چینی صدر نے عمران خان نوں الیکشن وچ جِت اُتے مبارکباد تی۔

عمران نے آکھیا کہ چینی دوستی پاکستان دی خارجا پالیسی دی بنیاد اے۔چین نے جِنی ترقی کیتی اے پاکستان اوہدے توں بہت متاثر اے۔ کرپشن تے غربت وچ کمی لئی پاکستان چین دے تجربے توں سکھنا چاہندا اے۔چینی صدر نے آکھیا کہ چین سیاسی و معاشی پور اُتے پاکستان دی مدد کرے گا۔ چین نے اقتصادی بحران وچ وی پاکستان نوں مشکل توں کڈھن لئی تعاون دی یقین دہانی کروائی اے۔ایس موقعے تے چین ولوں پاکستان نوں سی پیک دی مد وچ تن ارب ڈالر ہور گرانٹ ملن دا امکان اے۔ مجموعی طور اُتے چین ولوں چھ ارب ڈالر ملن دا امکان اے جیہدے وچ ڈیڈھ ارب ڈالر قرض تے ڈیڈھ ارب ڈالر امداد وی شامل اے۔