وزیر اعظم دا دورہ چین کامیاب، چھیتی قوم نوں خشخبری دیواں گے:فواد چودھری

عمران خان دا دورہ چین تاریخی اہمیت دا حامل اے، عمران خان ملک نوں اوکڑاں وچوں کڈھن لئی کوششاں کر رہے نیں:وفاقی وزیر

وزیر اعظم دا دورہ چین کامیاب، چھیتی قوم نوں خشخبری دیواں گے:فواد چودھری
عمران خان دا دورہ چین تاریخی اہمیت دا حامل اے، عمران خان ملک نوں اوکڑاں وچوں کڈھن لئی کوششاں کر رہے نیں:وفاقی وزیر

اسلام آباد(پاکستان پوائنٹ نیوز02۔نومبر۔2018ء) پاکستانی وزیراعظم عمران خان دے دورہ چین دے حوالے نال وفاقی وزیر اطلاعات فواد چودھری دا آکھنا اے کہ وزیر اعظم عمران خان دا چین دا دورہ کامیاب رہیا اے تے چھیتی قوم نوں خشخبری سناواں گے۔ چین ولوں پاکستان نوں وڈا اقتصادی پیکج ملن دا امکان اے۔ فواد چودھری دا ہور آکھنا سی کہ وزیر اعظم عمران خان دے چین دے دورے نال پاکستان دیاں اقتصادی اوکڑاں وچ کمی آئے گی۔

عمران خان دا دورہ چین تاریخی اہمیت دا حامل اے۔ عمران خان ملک نوں اوکڑاں وچوں کڈھن لئی کوششاں کر رہے نیں۔ یاد رہوے کہ وزیراعظم عمران خان چائنہ دے دورے اُتے نیں۔اج بیجنگ وچ وزیر اعظم عمران خان دی چینی صدر شی جنگ پنگ نال ملاقات ہوئی۔ ملاقات دوران پاک چین شراکت داری دے سارے پہلواں دا جائزہ لیا گیا تے ہر آزمائش اُتے پورا اُترن والی پاک چین دوستی ہور پکی بنان بارے گل بات کیتی گئی۔

دوناں رہنماواں وچکار خطے تے اک دوجے دے مفاد لئی شراکت داری نوں ہور پکا بنان بارے وی گل بات ہوئی۔ ملاقات مگروں وزیر اعظم عمران خان تے چینی صدر وچکار وفود دی سطح اُتے گل بات ہوئی۔ پاکستانی وفد وچ وزیر خزانہ اسدعمر، وزیر خارجا شاہ محمود قریشی، منصوبہ بندی، ریلوے دے وزیر تے وزیر اعلا بلوچستان جام کمال شامل نیں۔