اسلام آباد(پاکستان پوائنٹ نیوز02۔نومبر۔2018ء) پاک فوج دے ترجمان میجر جنرل آصف غفور نے آکھیا اے کہ آسیہ بی بی دا کیس 10ورھیاں توں عدالتاں وچ چل رہیا اے۔ ایس کیس دا فوج نال کوئی تعلق نہیں ، ہر معاملے وچ فوج نوں گھسیٹنا دُکھ دی گل اے۔ سرکاری ٹی وی نال گل بات کردے وئے اوہناں نے آکھیا کہ آسیہ بی بی کیس وچ قانونی کارروائی نوں مکمل ہون دتا جائے۔
معاملا عدالت وچ اے تے کوئی فیصلا آن مگروں مسلمان اگانہ دا راہ چُن سکدے۔ اوہناں نے آکھیا کہ پاک فوج دی خاہش اے کہ امن وامان دی صورتحال خراب کیتے بغیر معاملات حل ہو جان، آئین تے قانون دیاں حد بندیاں نیں، جیہدا احترام کرنا چاہیدا۔ میجر جنرل آصف غفور نے آکھیا کہ ہر کیس وچ فوج نوں گھسیٹن دی کوشش کیتی جاندی اے۔ آسیہ بی بی کیس عدالتی معاملا اے۔
پاک فوج دا ایہدے نال کوئی تعلق نہیں اے۔ ایس کیس نوں لے پاکستانی فوج خلاف گل کرنا دُکھ دی گل اے۔ اوہناں نے آکھیا کہ پاک فوج خلاف گلاں نوں لمے چِر توں برداشت کر رہے آں۔ آئین و قانون مطابق ایکشن ہو سکدااے پر کوشش کیتی جائے کہ اوہ نوبت نہ آئے کہ پاک نوں ایکشن لینا پئے۔ اوہناں نے آکھیا کہ اسلام سانوں امن و محبت دا سبق دیندا اے۔ سانوں اسلامی تعلیمات نوں نہیں چھڈنا چاہیدا۔ سارے مسلماناں دا رسول نال محبت دارشتہ اے۔ حضور دی محبت دے رشتے اُتے کوئی سمجھوتا نہیں کراں گے۔اوہناں نے آکھیا کہ سپریم کورٹ دے فیصلے خلاف مذہبی جماعتاں نال دھرنا دتا جدکہ حکومت ولوں وکھالویاں نال گل بات کرن دی کوشش کیتی جا رہی اے تے آئی ایس آئی دے نمائندے ایس وفد وچ شامل نیں۔
