لاہور(پاکستان پوائنٹ نیوز02۔نومبر۔2018ء) آسیہ بی بی دے بھرا جیمز مسیح دا آکھنا اے کہ آسیہ بی بی پاکستان وچ محفوظ نہیں اے۔ آسیہ بی بی کول ملک چھڈن توں وکھ کوئی ہور دوجا راہ نہیں اے۔ میڈیا رپورٹس مطابق آسیہ بی بی دے بھرا جیمز مسیح دا آکھنا اے کہ اجے اوہ اوس ملک دا نہیں دس سکدا جتھے آسیہ بی بی نوں لیجایا جائے گا پر سپین تے فرانس نے آسیہ بی بی نوں پناہ دین دی آفر کیتی اے۔
جیمز مسیح نے ہور دسیا کہ آسیہ بی بی دا شوہر عاشق مسیح اکتوبر وچ ای اپنے بالاں نال برطانیہ توں واپس آیا تے اوہ آسیہ بی بی دی رہائی دی اُڈیک وچ سی۔ پر ذکر کیتے گئے خاندان نوں سپریم کورٹ توں آن والے فیصلے مگروں ملک وچ پیدا ہون والی صورتحال نوں مُکھ رکھدے ہوئے لُکا کے رکھیا گیا اے۔عاشق مسیح دا آکھناسی کہ آسیہ دیاں دو نِکیاں دھیاں دی عمر اوس ویلے دس ورھے توں وی گھٹ سی جدوں آسیہ بی بی نوں جیل ہوئی تے اوہناں نوں ماں نال گزاریا ویلا وی یاد نہیں اے۔ عاشق مسیح نے آکھیا کہ عدالت دے شکر گزار آں کہ اوہنے سانوں انسان سمجھدے ہوئے عقیدے تے مذہب دے فرق دے بغیر انصاف دتا۔
