مظفر آباد(پاکستان پوائنٹ نیوز01۔نومبر۔2018ء) آزاد کشمیر وچ عام چھٹی دا اعلان کر دتا گیا۔تفصیل مطابق آسیہ بی بی کیس دا فیصلا آن مگروں ملک بھر وچ کشیدہ حالات دی وجہ توں آزاد کشمیر وچ عام چھٹی دا اعلان کر دتا گیا اے۔ آزاد کشمیر حکومت نے اعلان کیتا اے کہ جمعے دے دیہاڑے پورے آزاد کشمیر وچ عام چھٹی ہوئے گی۔ ایس سلسلے وچ سارے نجی تے سرکاری ادارے بند رہن گے جدکہ پورے آزاد کشمیر چ سکیورٹی وی ہائی الرٹ رہوے گی۔
ایس توں وکھ میڈیا رپورٹس مطابق وفاقی وزارت تعلیم ولوں اعلان کیتا گیا اے کہ شہر بھر وچ سرکاری تے نجی سکول بند رہن گے۔ فیصلا موجودہ حالات وچ امن و امان دی صورتحال وِگڑن دے خدشے کارن کیتا گیا اے جدکہ پنجاب وچ وی تعلیمی ادارے بند رہن دا امکان ظاہر کیتا جا رہیا اے پر ایس حوالے نال اجے کوئی باضابطہ اعلان نہیں کیتا گیا۔ یاد رہوے کہ پچھلے دیہاڑے سپریم کورٹ آف پاکستان ولوں توہین رسالت دے مقدمے وچ قید آسیہ بی بی نوں رہا کرن دا حکم دتا گیا۔
آسیہ بی بی دی رہائی دے فیصلے خلاف لاہور سنے ملک دے ہور علاقیاں وچ مذہبی جماعتاں ولوں احتجاج کیتا جا رہیا اے۔ سپریم کورٹ دے فیصلے توں پہلاں ای تحریک لبیک پاکستان نے اپنے کارکناں نوں جمع ہون دی کال دیندے ہوئے آکھیا سی کہ جے آسیہ بی بی نوں رہا کیتا جائے تے اوہدے خلاف احتجاج ریکارڈ کرواؤ۔ عدالتی فیصلے مگروں آسیہ بی بی نوں بری کیتے جان خلاف کراچی سنے ملک دے کئی شہراں وچ تحریک لبیک ولوں احتجاجی وکھالے کیتے جا رہے نیں۔
تحریک لبیک پاکستان ولوں احتجاجی وکھالیاں دی وجہ توں لیاری ایکسپریس وے کراچی تے حیدر آباد دے دوویں روٹس نوں بند کر دتا گیا۔ کراچی وچ بلدیہ ٹاؤن چار نمبر، نمائش چورنگی، شارع فیصل سٹار گیٹ، سہراب گوٹھ اُتے احتجاجی وکھالا کیتا گیا۔ایس توں وکھ تحریک لبیک ولوں ملک بھر دے ہور شہراں، پنڈی، فیصل آباد ساہیوال، سرگودھا، حیدر آباد، لیہ، سکھر سنے کئی شہراں وچ احتجاجی وکھالے کیتے گئے۔ دوجے پاسے محکمہ داخلا پنجاب نے دفعہ 144دے تحت صوبے بھر وچ عوامی اجتماعات اُتے پابندی لا دتی اے جو 31اکتوبر توں 10نومبر تیکر رہوے گی۔
