لاہور(پاکستان پوائنٹ نیوز01۔نومبر۔2018ء) حمزہ شہباز شریف دی 13نومبر تیکر حفاظتی ضمانت منظور ہوگئی ۔ تفصیل مطابق پنجاب اسمبلی وچ اپوزیشن لیڈر میاں حمزہ شہباز شریف دی 13نومبر تیکر حفاظتی ضمانت منظور ہو گئی۔ عدالت نے نیب نوں آؤندی سنوائی تیکر حمزہ شہباز نوں گرفتار نہ کرن دا حکم دے دتا۔ حمزہ شہباز شریف نے حفاظتی ضمانت لئی ہائی کورٹ نال رابطہ کیتا سی۔
جسٹس علی باقر نجفی دی سربراہی وچ لاہور ہائی کورٹ دے دور کنی بنچ نے درخاست اُتے سنوائی کردے ہوئے حکم جاری کیتا۔ درخاست وچ حمزہ شہباز دا کہنا سی کہ ڈر اے نیب ولوں گرفتار کر لیا جائے گا ایس لئی قبل از گرفتاری ضمانت منظور کیتی جائے۔ عدالت نے حمزہ شہباز شریف دی13نومبر تیکر ضمانت قبل از گرفتاری منظور کردے ہوئے نیب نوں اوہناں نوں آؤندی سنوائی تیکر گرفتار نہ کرن دا حکم دے دتا اے۔
یاد رہوے کہ رمضان شوگر ملز دے ڈائریکٹر حمزہ شہباز شریف تے سلمان شہباز نوں نیب نے منگل دے دیہاڑے طلب کیتا سی۔ حمزہ شہباز پارٹی اجلاس وچ رلت دی وجہ توں اسلام آباد چلے گئے جدکہ سلمان شہباز باہرلے ملک نیں۔ ملزماں اُتے رمضان شوگر مل دے نیڑے پُل دی اُساری سرکاری خزانے وچوں کروان دا الزام اے۔
