لاہور(پاکستان پوائنٹ نیوز01۔نومبر۔2018ء) پاکستان وچ مذہبی فساد کھلارن لئی بھارتی چہرہ بے نقاب ہو گیا، وزیر اطلاعات پنجاب فیاض الحسن چوہان نے آکھیا اے کہ 90آئی ڈیز بھارت ولوں چل رہیاں سن، بھارت ولوں چلن والے جعلی اکاؤنٹس توں اشتعال انگیزی جاری سی۔ اوہناں نے اج ایتھے میڈیا نال گل بات کردے ہوئے آکھیا کہ نظرثانی پٹیشن تن وکیلاں نے دائر کیتی اے۔
عدالتی فیصلا اے ایہدے اُتے عدالتوں ای راہ کڈھیا جا سکدا اے۔اوہناں دا آکھنا سی کہ نظرثانی اپیل دائر کرنا اک آئینی راہ اے۔ متاثرہ فریق دا حق ہوندا اے۔ پٹیشن وچ آسیہ بی بی دا ناں ای سی ایل وچ پان دی استدعا کیتی گئی اے۔ آس اے کہ اج رات نوں دھرنا ختم ہو جائے گا۔ دھرنا ختم ہون بارے اعلان نہیں کر رہیا صرف اطلاع دے رہیا واں۔ اوہناں نے آکھیا کہ حکومت طاقت دا استعمال نہیں کرنا چاہندی سی۔ چاہندے آں ریاست دی رٹ قائم رہے۔وزیر اطلاعات دا آکھنا سی کہ اسیں کسے وی تھاں گولی، سوٹی یاں شیلنگ دی ورتوں نہیں کیتی۔ لگاتار خادم حسین رضوی تے ہور نال رابطے وچ آں۔
