اسلام آباد(پاکستان پوائنٹ نیوز01۔نومبر۔2018ء) حکومت نے احتجاج کرن والیاں نال مذاکرات دا آپشن استعمال کرن دا فیصلا کرلیا، احتجاج کرن والیاں نال پہلے مرحلے وچ آپریشن دی بجائے مذاکرات کیتے جان گے، حکومت نے مذاکرات لئی پنج رکنی کمیٹی بنا دتی اے۔ میڈیا رپورٹس مطابق وزیراعظم عمران خان نے توہین رسالت کیس وچ آسیہ بی بی دی رہائی مگروں ملک بھر وچ اُٹھن والی احتجاجی دی لہر نوں مُکھ رکھدے ہوئے قوم نال خطاب کیتا تے دو ٹوک لفظاں وچ آکھیا کہ ریاست دی رٹ نوں ہر حال وچ یقینی بنایا جائے گا۔
احتجاج کرن والیاں ساہمنے گِٹے نہیں ٹیکاں گے۔ کسے تھاں اُتے نہ کاروبار بند ہوئے گا تے نہ ای سڑکاں بلاک کرن دی اجازت دتی جائے گی۔ جے انج کیتا گیا تے سختی نال نِبڑاں گے۔ پر اج حکومت نے آپریشن دی بجائے احتجاج کرن والیاں نال مذاکرات لئی کمیٹی بنا دتی اے۔ پنج رکنی کمیٹی وچ وزیر اطلاعات فواد چودھری، وزیر خارجا شاہ محمود قریشی، وزیر مملکت برائے داخلا، وزیر مذہبی امور پیر نور الحق تے وزیر خوارک محبوب سلطان شامل نیں۔وزیر اعظم نے معاملے نوں حل کرن لئی مذاکراتی ٹیم دی منظوری دتی۔ دسیا گیا اے کہ وزیر اعظم عمران خان مذاکراتی عمل دی نگرانی آپ کرن گے۔
