اسلام آباد(پاکستان پوائنٹ نیوز01۔نومبر۔2018ء) دبئی وچ بے نامی جائیداد دے معاملے اُتے وزیراعظم عمران خان دی بھین نے ایف آئی اے نوں اپنا جواب جمع کروا دتا اے۔ تفصیل مطابق وزیراعظم عمران خان دی بھین علیمہ خانم نے ایس سلسلے وچ ایف آئی اے لاہور نال رابطہ کیتا تے انکوائری افسر نوں دسیا کہ اوہناں نے دبئی وچ موجود اپنی جائیداد ویچ دتی اے۔ علیمہ خانم نے اپنے جواب وچ آکھیا کہ میں دبئی دی پراپرٹی اپنے ٹیکس گوشواریاں وچ ظاہر کیتی سی۔
پراپرٹی مُل لین دا ذریعہ آمدن پاکستان واپسی اُتے دساں گی۔ یاد رہوے کہ پچھلے مہینے ایف آئی اے نے سیاسی تعلقات رکھن والے 44بندیاں دی لسٹ سپریم کورٹ وچ جمع کروائی سی، جیہناں دیاں متحدہ عرب امارات وچ جائیدادں نیں۔ ایس لسٹ وچ وزیراعظم دی بھین دا وی ناں سی۔ ایس حوالے نال ایف آئی اے نے سپریم کورٹ نوں دسیا سی کہ وزیر اعظم عمران خان دی بھین نوں نوٹس جاری کر دتا گیا اے۔ پر اطلاع ملی سی کہ اوہ ملکوں باہر نیں جیہدے مگروں اج علیمہ خانم نے ایف آئی اے نال رابطہ کر کے اپنا جواب جمع کروا دتا اے۔
