اسلام آباد(پاکستان پوائنٹ نیوز31۔اکتوبر۔2018ء) احتجاج مگروں پیدا ہون والی کشیدہ صورتحال دی وجہ توں نجی سکولاں دی تنظیم نے کراچی سنے پنجاب دے کئی شہراں وچ سکول بند رکھن دا اعلان کر دتا۔ تفصیل مطابق سپریم کورٹ آف پاکستان ولوں اج توہین رسالت دے مقدمے وچ قید آسیہ بی بی نوں رہا کرن دا حکم دے دتا گیا اے۔ آسیہ بی بی دی رہائی دے فیصلے خلاف لاہور سنے ملک دے ہور علاقیاں وچ مذہبی جماعتاں ولوں احتجاج کیتا جا رہیا اے۔
سپریم کورٹ دے فیصلے توں پہلاں ای تحریک لبیک پاکستان نے اپنے کارکناں نوں جمع ہون دی کال دیندے ہوئے آکھیا سی کہ جے آسیہ بی بی نوں رہا کیتا جائے تے اوہدے خلاف احتجاج ریکارڈ کرواؤ۔ عدالتی فیصلے مگروں آسیہ بی بی نوں بری کیتے جان خلاف کراچی سنے ملک دے کئی شہراں وچ تحریک لبیک ولوں احتجاجی وکھالے کیتے جا رہے نیں۔ تحریک لبیک پاکستان ولوں احتجاجی وکھالیاں دی وجہ توں لیاری ایکسپریس وے کراچی تے حیدر آباد دے دوویں روٹس نوں بند کر دتا گیا۔
کراچی وچ بلدیہ ٹاؤن چار نمبر، نمائش چورنگی، شارع فیصل سٹار گیٹ، سہراب گوٹھ اُتے احتجاجی وکھالا کیتا گیا۔ایس توں وکھ تحریک لبیک ولوں ملک بھر دے ہور شہراں، پنڈی، فیصل آباد ساہیوال، سرگودھا، حیدر آباد، لیہ، سکھر سنے کئی شہراں وچ احتجاجی وکھالے کیتے گئے۔ دوجے پاسے محکمہ داخلا پنجاب نے دفعہ 144دے تحت صوبے بھر وچ عوامی اجتماعات اُتے پابندی لا دتی اے جو 31اکتوبر توں 10نومبر تیکر رہوے گی۔
جیہدے مگروں ہن پرائیویٹ سکولز ایسوسی ایشن نے کل کراچی وچ تعلیمی ادارے بند رکھن د ااعلان کیتا اے۔ تنظیم دا آکھنا اے کہ انج دے حالات وچ بالاں دا سکول آنا مشکل ہوئے گا، ایس لئی بہتر اے کہ سکولاں نوں بند رکھیا جائے۔ایس توں وکھ آل پاکستان پرائیویٹ سکولز ایسوسی ایشن نے پنجاب دے کئی شہراں وچ سکولاں نوں بند رکھن دا اعلان کر دتا اے۔
