لاہور(پاکستان پوائنٹ نیوز31۔اکتوبر۔2018ء) پاکستان مسلم لیگ (ن) دے رہنما پرویز رشید نے مریم نواز دے چُپ رہن دی وجہ دس دتی۔ پرویز رشید نے نجی ٹی وی چینل نوں انٹرویو دیندے ہوئے آکھیا کہ مریم نواز دی ٹویٹ نوں شعلے وانگ لیا جاندا اے، مریم نواز دا وی چُپ رہنا ای بہتر اے۔ نواز شریف تے مریم نواز دی چُپ حکمت عملی دے تحت اے۔ حکومت آپ اپنا بیڑا غرق کرلے تے فیر اسیں بولاں گے۔
پرویز رشید نے ہور آکھیا کہ رکاوٹاں عمران خان دے راہ وچ وی آن گیاں۔ این آر او دے سوال اُتے پرویز رشید نے آکھیا کہ ساری سزا بھگتن مگروں این آر او دی آفر وچ کیہ دلکشی باقی رہ جاندی اے۔ اوہناں نے آکھیا کہ نیب افسراں دیاں وزیراں نال ملاقاتاں کیوں ہو رہیاں نیں۔ غیر جمہوری قوتاں طاقتور نیں تے اوہناں دے مفادات وی نیں۔یاد رہوے کہ ایس توں پہلاں نواز شریف دی چُپ بارے مشہور پرچا کار دا آکھنا سی کہ نواز شریف اجے آپے ای چُپ نیں۔
اوہ بُہتا نہیں بول رہے کیونکہ ایہو اوہناں دی حکمت عملی اے۔ حامد میر دا آکھنا سی کہ نواز شریف دا بیانیہ درست ثابت ہو گیا اے جدکہ شہباز شریف دا بیانیہ غلط ثابت ہویا اے۔ اج توں کُجھ دن پہلاں اک ای نجی محفل وچ نواز شریف نے کُجھ پیشنگوئیاں کیتیاں سن تے مینوں اوہ سچ ثابت ہوندیاں نظر آ رہیاں نیں۔ اوہناں نے آکھیا کہ نواز شریف نے عمران خان بارے گل بات کردے ہوئے آکھیا کہ عمران خان نوں کم کرن دیو تے تنگ نہ کرو ویکھنا کُجھ چِر مگروں عمران خان آپے اپنے پیراں اُتے کلہاڑی مارے گا۔
حامد میر دا آکھنا سی کہ ہن مینوں نواز شریف دیاں گلاں وچ کُجھ کُجھ سچائی نظر آنا شروع ہو گئی اے۔ نواز شریف اجے تے چُپ نیں پر کُجھ چِر مگروں اوہ پورے بھار نال ای آن گے تے فیر عمران خان نوں اوہ وزیر اعظم دی حیثیت نال نہیں بلکہ اپوزیسن لیڈر وانگ جواب دین گے۔
