پٹرول4تے ہائی سپیڈ ڈیزل6رُپئے مہنگا ہو گیا

پٹرول4تے ہائی سپیڈ ڈیزل6رُپئے مہنگا ہو گیا

اسلام آباد(پاکستان پوائنٹ نیوز31۔اکتوبر۔2018ء) پٹرول4 تے ہائی سپیڈ ڈیزل6رُپئے مہنگا ہو گیا۔ پٹرولیم وستاں دیاں قیمتاں وچ وادھا وزیر اعظم دی منظوری مگروں کیتا گیا اے۔ تفصیل مطابق پچھلے دیہاڑے اوگرا نے پٹرولیم وستاں(مصنوعات) دیاں قیمتاں وچ 13رُپئے وادھے دی سفارش کیتی سی۔ اوگرا دی سمری وچ پہلی نومبر توں پٹرول دی قیمت وچ 9رُپئے فی لیٹر وادھے دی سفارش کیتی گئی سی۔

اوگرا دی سمری وچ حکومت نوں مٹی دے تیل دی قیمت وچ 6رُپئے 47پیسے ، ڈیزل دی قیمت وچ 13رُپئے، لائٹ ڈیزل دی قیمت وچ 6رُپئے 48پیسے فی لیٹر وادھے دی سفارش کیتی گئی سی۔ پر ہن ایس حوالے نال تازہ اطلاع اے کہ پٹرولیم وستاں دیاں قیمتاں وچ 13رُپئے فی لیٹر وادھے دی بجائے 6رُپئے فی لیٹر وادھا کیتا گیا اے۔ وزیر اعظم عمران خان نے پٹرولیم وستاں دیاں قیمتاں وچ وادھے دی سمری منظوری کر لئی اے۔ وزیر اعظم دی منظوری مگروں پٹرول 4تے ہائی سپیڈ ڈیزل 6رُپئے لیٹر مہنگا ہو گیا اے۔