لاہور(پاکستان پوائنٹ نیوز31۔اکتوبر۔2018ء) لاہور وچ احتجاج مگروں کئی علاقیاں وچ موبائل فون سروس معطل۔تفصیل مطابق سپریم کورٹ ولوں توہین رسالت کیس وچ رہا ہون والی آسیہ بی بی دی رہائی دے فیصلے خلاف لاہور سنے ملک دے ہور علاقیاں وچ مذہبی جماعتاں نے احتجاج شروع کر دتا اے۔ سپریم کورٹ دے فیصلے توں پہلاں ای تحریک لبیک پاکستان نے اپنے کارکناں نوں جمع ہون دی کال دیندے ہوئے آکھیا سی کہ جے آسیہ بی بی نوں رہا کیتا جائے تے اوہدے خلاف احتجاج ریکارڈ کرواؤ۔
عدالتی فیصلے مگروں آسیہ بی بی نوں بری کیتے جان خلاف کراچی سنے ملک دے کئی شہراں وچ تحریک لبیک ولوں احتجاجی وکھالے کیتے جا رہے نیں۔ تحریک لبیک پاکستان ولوں احتجاجی وکھالیاں دی وجہ توں لیاری ایکسپریس وے کراچی تے حیدر آباد دے دوویں روٹس نوں بند کر دتا گیا۔ کراچی وچ بلدیہ ٹاؤن چار نمبر، نمائش چورنگی، شارع فیصل سٹار گیٹ، سہراب گوٹھ اُتے احتجاجی وکھالا کیتا گیا۔
ایس توں وکھ تحریک لبیک ولوں ملک بھر دے ہور شہراں، پنڈی، فیصل آباد ساہیوال، سرگودھا، حیدر آباد، لیہ، سکھر سنے کئی شہراں وچ احتجاجی وکھالے کیتے گئے۔ دوجے پاسے محکمہ داخلا پنجاب نے دفعہ 144دے تحت صوبے بھر وچ عوامی اجتماعات اُتے پابندی لا دتی اے جو 31اکتوبر توں 10نومبر تیکر رہوے گی۔ تازہ اطلاع مطابق لاہور وچ اسمبلی ہال چوک، داتا دربار، بابو صابو، چونگی امرسدھو تے ہور علاقیاں وچ صورتحال خراب ہو گئی اے۔ جیہدے مگروں ہن حکومت نے موبائل فون سروس بند کرنا شروع کر دتی اے۔
