اسلام آباد(پاکستان پوائنٹ نیوز31۔اکتوبر۔2018ء) توہین رسالت دے مقدمے وچ قید آسیہ بی بی نوں اج رہا کرن دا حکم دے دتا گیا۔ تفصیل مطابق چیف جسٹس دی سربراہی وچ تن رکنی بنچ نے فیصلا سُنایا۔ جسٹس آصف سعید کھوسہ تے جسٹس مظہر عالم خان وی بنچ دا حصہ سن۔ سپریم کورٹ نے لاہور ہائی کورٹ دا فیصلا کالعدم قرار دیند ے ہوئے آسیہ بی بی نوں الزام توں بر ی کیتا تے رہا کرن دا حکم جاری کر دتا۔
پر ہن آسیہ بی بی دی رہائی دا تفصیلی فیصلا جاری کر دتا گیا اے۔ چیف جسٹس آف پاکستان جسٹس ثاقب نثار نے تحریری فیصلے دی شروعات کلمہ شہادت توں کیتی۔ فیصلا 56صفحیاں اُتے مشتمل اے ،جیہنوں چیف جسٹس نے لکھیا۔ فیصلے وچ علامہ اقبال دا نعتیہ کلام ’کی محمدﷺ سے وفا تونے تو ہم تیرے ہیں‘ وی درج اے۔ فیصلے وچ قرآنی آیتاں تے حدیثاں دا حوالا دتا گیا اے۔
فیصلے وچ آکھیا گیا اے کہ جے آسیہ بی بی کسے ہور مقدمے وچ ملوث نہیں نیں تے اوہناں نوں رہا کر دتا جائے۔ فیصلے وچ آکھیا گیا کہ اپنے مذموم مقصداں لئی توہین رسالت دے قانون دا غلط استعمال کیتا جاندا اے۔ ایس قانون دے غلط استعمال دی تازہ مثال مشال خان قتل کیس اے۔ برداشت اسلام دا اصول زریں اے ۔ مخلوق خدا دے وچکار برابری، فکرو وجدان تے عقیدے دی بنیاد ی آزادی توں متعلق اے۔
ایہ نہ صرف ساڈی مذہبی تے اخلاقی ذمے واری اے بلکہ ایہدا تعلق انسانی تکریم توں وی اے۔ ایہ قانون دا طے شدہ اصول اے کہ جو الزام لاؤندا اے تے اوہ الزام ثابت وی کردا اے۔ ایس لئی ملزم اُتے لائے گئے الزاماں نوں ثابت کرنا استغاثہ دی ذمے واری سی۔ ملزم اوس ویلے تیکر معصوم ہوندا اے جدوں اوہدے خلاف الزام ثابت نہ ہوئے۔ کرمنل جسٹس وچ شک توں پاک ثبوت بنیادی اہمیت رکھدا اے۔
ایہدا مقصد ایہ اے کہ کسے بے گناہ نوں سزا نہ ہوئے۔ اللہ دے نبی دے ناں اُتے سچ وچ جھوٹھ نوں ملانا وی توہین رسالت توں گھٹ نہیں اے۔شکایت کرن والے ولوں آسیہ بی بی دے مذہب دی توہین کیتی گئی۔ مذہب اسلام کُجھ وی برداشت کر سکدا اے پر ناانصافی، جبر تے انسانی حقاں دی پامالی نہیں۔ فیصلے وچ آکھیا گیا کہ استغاثہ آسیہ بی بی خلاف اپنا مقدمہ بلا شک و شبہ ثابت کرن وچ ناکام رہیا۔ سارے گواہ، ثبوت، حقائق تے بیاناں وچ ہیر پھیر اے۔ آسیہ بی بی اُتے توہین رسالت دا الزام ثابت نہیں ہویا۔ عدالت نے حکم دتا کہ جے آسیہ بی بی اُتے کوئی ہور مقدمہ نہیں تے اوہناں نوں رہا کر دتا جائے۔
