کراچی،لاہور، راولپنڈی(پاکستان پوائنٹ نیوز31۔اکتوبر۔2018ء) سپریم کورٹ آف پاکستان ولوں ثبوت نہ ہون اُتے آسیہ بی بی نوں بری کیتے جان خلاف کراچی سنے ملک دے کئی شہراں وچ تحریک لبیک ولوں احتجاجی وکھالے کیتے جا رہے نیں۔ تفصیل مطابق اج سپریم کورٹ آف پاکستان نے توہین رسالت دے جرم وچ سزائے موت پان والی مسیحی سوانی آسیہ بی بی نوں ثبوت نہ ہون اُتے بری کر دتا۔
فیصلے مگروں کراچی دے کئی علاقیاں وچ تحریک لبیک پاکستان ولوں احتجاجی وکھالیاں دی وجہ توں لیاری ایکسپریس وے کراچی تے حیدر آباد دے دوویں روٹس نوں بند کر دتا گیا۔ کراچی وچ بلدیہ ٹاؤن چار نمبر، نمائش چورنگی، شارع فیصل سٹار گیٹ، سہراب گوٹھ اُتے احتجاجی وکھالا کیتا گیا۔ایس توں وکھ تحریک لبیک ولوں ملک بھر دے ہور شہراں، پنڈی، فیصل آباد، لاہور، ساہیوال، سرگودھا، حیدر آباد، لیہ، سکھر سنے کئی شہراں وچ احتجاجی وکھالے کیتے گئے۔ دوجے پاسے محکمہ داخلا پنجاب نے دفعہ 144دے تحت صوبے بھر وچ عوامی اجتماعات اُتے پابندی لا دتی اے جو 31اکتوبر توں 10نومبر تیکر رہوے گی۔
