ملتان(پاکستان پوائنٹ نیوز30۔اکتوبر۔2018ء) ملک بھر وچ عدالتی نظام دے ہون مگروں وی اجے تیکر کئی لوک پنچایتاں اُتے یقین رکھدے نیں۔ اج دے دور وچ وی ملک دے کئی پسماندہ علاقیاں وچ وڈے وڈے فیصلے وی پنچایتاں وچ ہوندے نیں جتھے پنڈ دے کئی کیساں دا فیصلا سُنا دتا جاندا اے تے سبھ لوکاں نوں اوس فیصلے نوں مننا پیندا اے۔ کُجھ دن پہلاں ای ملتان وچ وی پنچایت دا اک انوکھا فیصلا ویکھن وچ آیا جتھے پنچایت نے اک ڈاکٹر کُڑی نوں ان پڑھ مُنڈے نال ویاہ کرن دا فیصلا سُنا دتا، ایہو نہیں بلکہ ایس فیصلے خلاف جدوں پولیس نال رابطہ کیتا گیا تے پولیس وی جاگیرداراں نال ملی ہوئی نظر آئی۔
تفصیل مطابق چک بٹھار تحصیل روجھان دے واسی جاگن خان مزاری نے آکھیا کہ علاقے دے جاگیرداراں نے پنچایت دے ذریعے حکم دتا کہ رشتے لئی دھیاں دے دیو یاں فیر 123ایکڑ زمین چھڈ دیو جو میری ملکیتی اے۔ پاکستان کمیشن برائے انسانی حقوق ملتان دفتر وچ پریس کانفرنس کردے ہوئے اوہناں نے آکھیا کہ میری دھیاں ایم بی بی ایس فائنل ائر دی طالبہ نیں، میں اوہناں دا ان پڑھ لوکاں نال رشتہ کیویں کر دیواں؟ایس سلسلے وچ ڈپٹی سپرنٹنڈنٹ پولیس روجھان نوں درخاست دتی گئی پر اوہناں ولوں کوئی وی شنوائی نہ ہوئی۔
اوہناں نے الزام لایا کہ ویکھن نوں لگدا اے کہ پولیس افسر وی ملزماں نال رلے ہوئے نیں، جیہدی وجہ توں سانوں انصاف نہیں لبھ رہیا۔ اوہناں نے آکھیا کہ اسیں در در دیاں ٹھوکراں کھا رہے آں۔ ملزماں کولوں بالاں تے میرے خاندان نوں جان دا خطرہ اے۔ جاگن خان مزاری نے آکھیا کہ چیف جسٹس آف پاکستان جسٹس ثاقب نثار تے اعلا حکا م اگے انصاف دی بینتی کرنا واں۔
