اسلام آباد(پاکستان پوائنٹ نیوز30۔اکتوبر۔2018ء) وزیر اعظم عمران خان نے اقتدار وچ آؤندے ای کفایت شعاری مہم دے تحت وادھو خرچے نہ کرن تے سادگی اپنان دا عہد کیتا جیہدے اُتے کافی حد تیکر عملدرآمد تے کیتا گیا پر کُجھ دن پہلاں صدر مملکت ڈاکٹر عارف علوی نے وزیراعظم عمران خان دی کفایت شعاری پالیسی دیاں ٹھیک ٹھاک دھجیاں اودوں اُڈائیاں، جدوں اوہناں نے سکردو دے دورے دوران مہنگا ترین ناشتہ کیتا۔
قومی اخبار وچ چھپن والی اک رپورٹ وچ دسیا گیا کہ سکردو دے دورے دوران صدر مملکت ڈاکٹر عارف علوی دے ناشتے اُتے 50لکھ رُپئے خرچہ آیا پر وزیر اعظم عمران خان ولوں جواب منگن اُتے ڈاکٹر عارف علوی نے اوہناں نوں بل دی رسید وکھائی تے دسیا کہ خرچہ 50لکھ رُپئے نہیں بلکہ 51ہزار پنج سو رُپئے ہویا سی جو میں آپ جیب وچوں دتا۔پر ہن عارف علوی ولوں دتیاں گئیاں رسیداں دا وی راز کُھل گیا تے ایہناں رسیداں وچ غلطیاں دی نشان کاری مگروں عارف علوی دے بیان اُتے شک پیدا ہو گیا اے۔
ایس حوالے نال مائیکرو بلاگنگ ویب سائٹ ٹویٹر اُتے پرچا کار ندیم ملک نے اک تصویر شیئر کیتی، ایہ تصویر ڈاکٹر عارف علوی ولوں وزیر اعظم عمران خان نوں وکھائی گئی ۔جو بل دی رسید سی، جیہدے وچ اوہناں دے ناشتے دے خرچے درج سن۔ندیم ملک نے آکھیا کہ صدر مملکت ڈاکٹر عارف علوی نے وزیراعظم عمران خان نوں ایہ بل وکھایا تے دعوا کیتا کہ اوہناں نے اپنے تے اپنے خاندان دے ناشے دا بل اپنی جیب وچوں دتا۔
بل اُتے درج تفصیلاں مطابق سکردو وچ صدر مملکت ڈاکٹر عارف علوی دا کل بل 51,500رُپئے سی۔ ایس تصویر نوں ویکھ کے سوشل میڈیا ورتیندڑاں نے بل وچ موجود غلطیاں دی نشان کاری(نشاندہی) کر دتی۔ اک ٹویٹر ورتیندڑ(صارف)نے آکھیا کہ ویکھن نوں انج لگدا اے کہ ایہ بل بعد وچ بنوایا گیا کیونکہ ایس بل اُتے نہ تے انوائس نمبر اے نہ ای 16فیصد جی ایس ٹی ٹیکس لا گیا اے۔
