اسلام آباد(پاکستان پوائنٹ نیوز30۔اکتوبر۔2018ء) زیراعظم نے فٹ پاتھ اُتے سون والے بے گھر بندیاں لئی شاندار اعلان کر دتا۔میڈیا رپورٹس وچ دسیا گیا اے کہ وزیراعظم عمران خان نے بے گھر تے مجبور بندیاں لئی اک ہور فلاحی منصوبے دا اعلان کیتا اے۔ وزیر اعظم عمران خان نے فٹ پاتھ تے سڑکاں اُتے سون والے بے گھر بندیاں لئی شاندار فیصلا کردے ہوئے اوہناں نوں گھر دین دے منصوبے دا اعلان کیتا اے۔
پہلا منصوبہ لاہور وچ سرکاری زمین اُتے شروع ہوئے گا۔ مسافراں لئی پنج شلٹرز وی بنائے جان گے۔ مسافراں نوں عارضی چھت تے دو ویلے دی روٹی دتی جائے گی۔مالی طاقت رکھن والے شہری ایس منصوبے دی شروعات کراچی وچ وی کر سکدے نیں۔یاد رہوے کہ ایس توں پہلاں وزیر اعظم عمران خان ولوں بے گھر بندیاں نوں گھر دین لئی 50لکھ گھر بنان دا وی اعلان کیتا گیا سی۔
ایس حوالے نال پنجاب سرکار نے ’نیا پاکستان‘ ہاؤسنگ پروگرام دے تحت فیصل آباد وچ 650کینال زمین وی لے لئی اے۔ وسیلیاں مطابق پائلٹ پراجیکٹ لئی فیصل آباد وچ مکوانہ روڈ اُتے تھاں لِتی گئی اے،جتھے گھر بنائے جان گے۔ وسیلیاں نے دسیا کہ پائلٹ پراجیکٹ دی وفاقی ٹاسک فورس تے پنجاب سرکار مانیٹرنگ کرے گی۔ سارے محکمیاں دے این او سی لئی ون ونڈو آپریشن ہوئے گا۔ صوبائی حکومت نے فیصل آباد وچ پائلٹ پراجیکٹ دو ورھیاں وچ مکمل کرن دا فیصلا کیتا اے تے سارے محکمیاں نوں منصوبے نوں چھیتی پورا کرن لئی کم کرن دا حکم وی دتا گیا اے۔
