این آر او لئی سبھ نے درخاستاں گھلیاں نیں: فواد چودھری دا دعوا

اپوزیشن دے سارے کیسز روک دئیے تے اوہناں لئی سبھ ٹھیک ہو جائے گا، پراسیکیوشن ساڈی اے جے این آر او دینا ہوئے تے اسیں ای دیواں گے:نجی ٹی وی نال گل بات

این آر او لئی سبھ نے درخاستاں گھلیاں نیں: فواد چودھری دا دعوا
 اپوزیشن دے سارے کیسز روک دئیے تے اوہناں لئی سبھ ٹھیک ہو جائے گا، پراسیکیوشن ساڈی اے جے این آر او دینا ہوئے تے اسیں ای دیواں گے:نجی ٹی وی نال گل بات

اسلام آباد(پاکستان پوائنٹ نیوز29۔اکتوبر۔2018ء) وفاقی وزیر اطلاعات فواد چودھری نے آکھیا اے کہ این آر او لئی سبھ نے درخاستاں دتیاں نیں۔ میڈیا رپورٹس وچ دسیا گیا اے کہ نجی ٹی وی چینل نال گل بات کردے ہوئے فواد چودھری نے آکھیا کہ عمران خان درویش بندے نیں تے پاکستان لئی بیسٹ نیں۔ عمران خان بہت محنت کر رہے نیں۔ سبھ نوں پتا اے کہ وزیراعظم اپنی ذات لئی نہیں بلکہ ملک لئی کم کر رہے نیں۔

اوہناں دا آکھنا سی کہ عثمان بزدار ہوئے یاں فیر میں، سانوں عمران خان دی وجہ توں طاقت ملی ۔ کیہڑے کھڈاری نوں کتھے کھڈانا اے ایہ فیصلا کپتان دا ہوندا اے۔ فواد چودھری نے ایہ وی دعوا کیتا کہ این آر او لئی سبھ نے درخاست دتیاں ہوئیاں نیں۔ جے تحریک انصاف مک مُکا دی سیاست کردی تے اقتدار وچ نہ آؤندی۔ اپوزیشن دے سارے کیسز روک دئیے تے اوہناں لئی سبھ ٹھیک ہو جائے گا۔

پراسیکیوشن ساڈی اے جے این آر او دینا ہوئے تے اسیں ای دیواں گے۔یاد رہوے کہ ایس توں وکھ وفاقی وزیر ریلوے شیخ رشید نے آکھیا اے کہ شہباز شریف این آر او دی کوشش کر رہے نیں۔ نواز شریف ڈپریشن دا شکار نیں۔ مولانا فضل الرحمان اسلام دا ناں لیندے نیں تے اوہناں دی نظر اسلام آباد اُتے اے۔ اوہناں نے اپوزیشن دی آل پارٹیز کانفرنس بارے پُچھے گئے سوال اُتے آکھیا کہ مولانا فضل الرحمان دی نظر اسلام آباد اُتے اے جدکہ اوہ ناں اسلام دا لیندے نیں۔

اوہناں نے آکھیا کہ نواز شریف ڈپریشن دا شکار نیں۔ شہباز شریف این آر او دی سِر توڑ کوشش کر رہے نیں۔ایس توں وکھ اوہناں نے پچھلے دیہاڑے اپنے اک ٹی وی انٹرویو وچ آکھیا کہ میری عمران خان نال پوری ہمددری اے۔ اوہناں نوں بُرے حالات وچ حکومت ملی اے۔ میں سچا آدمی آں۔ 8سال توں میں جھوٹھ بولنا چھڈ دتا اے۔ میرا ریلوے وچ نعرہ اے آرام حرام اے۔اوہناں نے واضح کیتا کہ سعودی عرب نے پاکستان نوں 3فیصد انٹرسٹ ریٹ اُتے قرضہ دتا اے۔

ایس توں وکھ سعودی عرب نے کوئی شرط نہیں رکھی۔اوہناں نے آکھیاکہ آصف زرداری تے بلاول بھٹو اک پیج اُتے نہیں نیں۔ پیشنگوئی کر رہیاں واں کہ بلاول بھٹو اپنے والد دے آکھے توں باہر نکل رہیا اے۔اوہناں نے آکھیا کہ مینوں تے ہن حکمرانی وچ آکے پتا لگا اے کہ شہباز شریف نواز شریف توں وڈا چور اے۔ اوہناں دا آکھنا سی کہ مینوں اختیار مل جائے تے میں ایہناں 40کرپٹ بندیاں نوں مینار پاکستان اُتے کھڑا کرکے گولی مار دیواں۔