اسلام آباد(پاکستان پوائنٹ نیوز29۔اکتوبر۔2018ء) تحریک انصاف وچ تنظیمی تبدیلیاں کیتیاں گئیاں نیں۔ انجینئر عطااللہ شادی خیل شمالی پنجاب دے صدر مقرر کیتے گئے نیں جدکہ غلام سرور خان پی ٹی آئی مغربی پنجاب دے صدر تے اعجاز چودھری پارٹی دے مرکزی ایڈیشنل سیکرٹری مقرر کیتے گئے نیں۔ ایس توں وکھ عمر ڈار نوں مرکزی پنجاب دا صدر مقرر کیتا گیا اے ۔ ایس توں پہلاں ایہ عہدہ علیم خان کول سی۔
سربراہ پاکستان تحریک انصاف عمران خان دی منظوری مگروں نوٹی فکیشن جاری کردتا گیا اے۔ میڈیا رپورٹس وچ ہور دسیا گیا اے کہ حکومتی عہدہ رکھن والیاں دی بجائے عام پارٹی رہنماواں نوں پارٹی عہدے دتے جان گے۔ یاد رہوے کہ پاکستان تحریک انصاف دی نویں سِرے توں تنظیم سازی شروع کیتی گئی سی۔ پہلی اکتوبر مگروں تنظیم سازی دے حوالے نال جاری کیتے گئے سارے نوٹی فکیشن کالعدم قرار دے دتے گئے سن پر سندھ نوں ایس حوالے نال استثنا حاصل سی۔
