اسلام آباد(پاکستان پوائنٹ نیوز29۔اکتوبر۔2018ء) ٹیکس چور پھڑن وچ مدد کرن والیاں لئی خشخبری،حکومت دا ٹیکس چور پھڑن وچ مدد کرن والیاں نوں پیسے دین دا منصوبہ۔ میڈیا رپورٹس دے مطابق حکومت نے ٹیکس چوری پھڑن وچ تعاون اُتے ہن معاوضہ دین دا فیصلا کیتا اے۔ ایس بارے حکومت نوں ملن والیاں تجویزاں دا جائزہ لیا جا رہیا اے۔ معلومات دین والیاں دے ناں خفیہ رکھے جان گے۔
متعلقہ اداریاں توں ڈبل چیکننگ کروان دی تجویز شامل اے۔ کسٹم وچ ڈیوٹی تے ٹیکس چوری دی جھوٹھی خبر بارے معیار وی ترتیب دتا جا رہیا اے۔ سیلز ٹیکس وچ سپلائے تے استعمال دے آنکڑے(اعدادو شمار) اُتے وی ریکارڈ چیکنگ ہوئے گی۔ متعلقہ حکام کولوں سوالنامہ وی تیار کیتا جائے گا۔ انکم ٹیکس وچ چوری پھڑن والیاں نوں زیادہ توں زیادہ معلوما ت دینیاں پین گیاں تے اوہدے وچ مدد دا معاوضہ وی زیادہ دتا جائے گا۔
این ٹی این نمبر، ترسیل پیسے، ادائیگی دی تاریخ تے بنک دا ناں معاون نوں دینا پئے گا۔ سسٹم نوں کامیاب بنان لئی ٹیکس ریوارڈ دے نظام وچ تبدیلیاں متوقع نیں۔یاد رہوے کہ ایس توں پہلاں وزیر اعظم عمران خان نے کرپشن روکن لئی شاندار اعلان کیتا سی۔ وزیر اعظم عمران خان دا کہنا سی کہ کرپشن دی نشان کاری کرن والے نوں 20توں 25فیصد انعام ملے گا۔
