اسلام آباد(پاکستان پوائنٹ نیوز29۔اکتوبر۔2018ء) چیف جسٹس پاکستان میاں ثاقب نثار نے بنی گالا وچ جائیداداں دی ریگولرائزیشن نہ کرائے جان اُتے خفگی دا اظہار کردے ہوئے آکھیا کہ وزیر اعظم عمران خان اج ای ریگولرائزیشن کروان، سبھ توں پہلاں اوہ آپ فیس جمع کروان، عدالتی حکم اُتے عمل کر کے دوجیاں لئی مثال بنن۔ تفصیل مطابق اج سپریم کورٹ وچ چیف جسٹس میاں ثاقب نثار دی سربراہی وچ تن رکنی بنچ نے بنی گالا وچ تجاوزات کیس دی سنوائی کیتی۔
سنوائی دوران عدالت نے بنی گالا وچ جائیداداں دی ریگولرائزیشن نہ کرائے جان اُتے خفگی دا اظہار ی کیتا۔ ایس موقعے تے عدالت نے وزیر اعظم عمران خان دی نمائندگی کرن والے وکیل بابر اعوان نوں آکھیا کہ وزیر اعظم نوں دسو کہ ریگولرائزیشن کروان، لیڈر نوں مثال قائم کرنی پیندی اے، ایہ تہاڈے لئی چنگا نہیں ہوئے گا۔ چیف جسٹس نے آکھیا کہ 10دن دا ویلا دتا سی اجے تیکر کوئی پیش رفت نہیں ہوئی۔
ایس دوران ایڈیشنل اٹارنی جنرل نیئر رضوی نے عدالت نوں دسیا کہ سیکرٹری داخلا نے عدالتی حکم اُتے بنائی گئی ریگولرائزیشن کمیٹی دا اک اجلاس منعقد کیتا اے۔ صرف 10دن دی مہلت دے دیو۔ چیف جسٹس نے آکھیا کہ اک دن دی وی مہلت نہیں دیواں گے۔ایڈیشنل اٹارنی جنرل نے عدالت نوں دسیا کہ اج سیکرٹری داخلا دی صدارت ہیٹھ کمیٹی دا اجلاس اے۔3وجے تیکر دی مہلت دے دیو۔ ایہدے اُتے عدالت نے رات 10وجے توں پہلاں ٹھوس اقدامات بارے آگاہ کرن دا حکم دتا۔ جیہدے مگروں ہن کیس دی سنوائی کل ہوئے گی۔
