اسلام آباد(پاکستان پوائنٹ نیوز29۔اکتوبر۔2018ء) حکومت نے لاہور توں کاشغر تیکر بس سروس شروع کرن دا فیصلاکر لیا، پاک چائنا بس سروس دا 13ہزار رُپئے اک پاسے دا کرایہ ہوئے گا، مسافراں نوں تن ویلے دا کھانا تے چاہ وی دتی جائے گی۔ میڈیا رپورٹس وچ دسیا گیا اے کہ سی پیک دے حوالے نال اک اہم پیش رفت ساہمنے آئی اے۔ پاک چائنا بس سروس شروع کرن دا فیصلا کیتا گیا اے۔
بس سروس لاہور توں کاشغر تک ہوئے گی۔ بس لاہور توں براستہ خنجراب چائنا بارڈر اپڑے گی۔ بس سروس دا ناں ’سی پیک پیسنجر ‘سروس رکھیا گیا اے۔ بس سروس اگلے مہینے دے آخیر یاں دسمبر دے پہلے ہفتے شروع کیتی جائے گی۔ ذکر کیتی گئی بس سروس دے مسافراں نوں چین دا ویزہ تے ریٹرن ٹکٹ اپنے کول رکھنا پئے گا۔ لاہور توں کاشغر تے کاشغر توں لاہور تیکر دا کرایہ 23000رُپئے ہوئے گا۔
جدکہ اک پاسے دا کرایہ 13ہزار ہویا کرے گا۔ بس ہفتے وچ چار دن چلے گی۔ پاک چائنا بس رات 12وجے چلیا کرے گی، جو اسلام آباد، مانسہرہ، بشام تے چلاس توں ہوندی ہوئی رات 8وجے گلگت اپڑے گی۔ چار گھنٹے، گلگت وچ ٹھہرن مگروں بس فیر ٹُرے گی تے اگلے دن تن وجے بس کاشغر اپڑے گی۔ مسافراں نوں تن ویلے دا کھانا تے چاہ وی دتی جائے گی جدکہ خنجراب بارڈر اُتے رات ٹھہرن دا انتظام وی کیتا جائے گا۔دوجے پاسے ایس بس سروس دا اعلان ہوندے ای سوشل میڈیا اُتے لوکائی ولوں خُشی دا اظہار کیتا جا رہیا اے۔
