اسلام آباد(پاکستان پوائنٹ نیوز27۔اکتوبر۔2018ء) اسرائیلی جہاز دے خفیہ طور اُتے پاکستان آن بارے کل توں سوشل میڈیا اُتے خبراں گھم رہیاں نیں پر ایس حوالے نال حکومت ولوں کل کوئی ردعمل نہیں دتا گیاسی ۔ سوشل میڈیا اُتے ایہناں دعویاں بارے تبصریاں دا زور ودھیا تے سابق وزیر و مسلم لیگ (ن) دے رہنما احسن اقبال نے مائیکرو بلاگنگ ویب سائٹ ٹویٹر اُتے اپنے ٹویٹ وچ موجودہ حکومت کولوں جواب منگدے ہوئے آکھیا کہ حکومت حقیقی صورتحال فوری طور اُتے واضح کرے۔
جیہدے اُتے ردعمل دیندے ہوئے وفاقی وزیر اطلاعات فواد چودھری نے آکھیا کہ حقیقی صورتحال ایہ اے کہ عمران خان نواز شریف اے نہ اوہدی کابینہ وچ تہاڈے ورگے جعلی ارسطو نیں۔ اسیں نہ مودی جی نال خفیہ مذاکرات کراں گے نہ اسرائیل نال۔ تہانوں پاکستان دی اینی فکر ہوندی جِنی ظاہر کر رہے او تے اج اسیں ایہناں حالات وچ نہ ہوندے، ایس لئی جعلی فکر نہ کرو، پاکستان محفوظ ہتھاں وچ اے۔
فواد چودھری نے اپنے ٹویٹ وچ احسن اقبال نوں تے کرارا جوب دے دتا پر اسرائیلی جہاز دی خفیہ طور اُتے پاکستان آمد توں بارے واضح اکھراں وچ نہ تے تردید کیتی تے نہ ای تصدیق۔یاد رہوے کہ ایس حوالے نال اسرائیلی اخبار دے ایڈیٹرنے اسرائیلی جہاز دی پاکستان آمد بارے دعوا کیتا،جیہدے مگروں ایس حوالے نال کئی قسم دیاں گلاں ہون لگیاں نیں۔ مائیکرو بلاگنگ ویب سائٹ ٹویٹر اُتے اپنے پیغام وچ اسرائیلی اخبار دے ایڈیٹر نے کُجھ تصویراں وی شیئر کیتیاں تے آکھیا کہ اک جہاز اسلام آباد لینڈ کیتا۔
اُڈاناں دی آوا جاوی یاں لائیو ائر ٹریفک اُتے نظر رکھن والی ویب سائٹ فلائٹ ریڈار اُتے ایس اُڈان دے اسلام آباد آمد تے دس گھنٹے مگروں اُڈان بھرن دے ثبوت موجود نیں۔ پر ایس حوالے نال پتا لان دی کوشش کیتی جا رہی اے کہ آخر جہاز وچ سوار ہو کے کون پاکستان گیا؟ایوی شراف دا آکھنا اے کہ اسرائیلی جہاز بدھ 24اکتوبر دی سویر اسرائیلی راجدھانی تل ابیب توں اُڈا کے اسلام آباد اپڑیا۔
اوہناں نے آکھیا کہ ایس جہاز دے پائلٹ نے اُڈان دوران ’چالاکی‘ کیتی۔ جہاز تل ابیب توں اُڈ کے پنج منٹ لئی اُردن دی راجدھانی عمان دے کوئین عالیہ ہوائی اڈے اُتے لتھیا تے لتھن مگروں اوسے رن وے توں واپس اُڈان لئی تیار ہویا۔ ایس طرحاں ایہ اُڈان جو تل ابیب توں اسلام آباد دے روٹ اُتے جان دی بجائے ایس نِکی جیہی’ چالاکی‘ دی مدد نال تل ابیب توں عمان دی اُڈان بنی تے پنج منٹ اوتھے لتھن تے واپس اُڈان بھرن نال ایہ اُڈان عمان توں اسلام آباد دی فلائٹ بن گئی۔
ایس طرحاں روٹ بدلن نال اُڈان دے مخصوص کوڈ وی مختلف ہو جاندے نیں جیہناں توں ایہ مختلف ائر ٹریفک دے ٹاورز نال رابطہ کر کے شناخت کرواندے نیں تے انج ایس اُڈان نے پاکستان جان دے مسئلے دا حل کڈھیا۔ جہاز پہلے ای اسرائیلی نہیں سی تے ایس چالاکی نال اُڈان وی عمان توں اسلام آباد دی بن گئی۔ اپنی گل دی وضاحت کرن لئی صحافی ایون شراف نے ایس طرحاں دی اک ہور اُڈان دا ثبوت اپنے ٹویٹر اُتے دتا جو ابوظہبی توں تل ابیب، سعودی عرب دے اُتوں اُتوں اُڈان بھر کے آئی پر براستہ عمان جتھے جہاز اُتریا تے فیر نویں کوڈ نال اُڈان بھرگیا۔
اسرائیلی جہاز دی پاکستان آمدن بارے دعویاں نے سوشل میڈیا اُتے اک نویں بحث چھیڑ ددتی اے۔ اک ہور غیر ملکی اخبار نے وی ٹویٹر اُتے ایس دعوے نوں بریکنگ نیوز بنا کے شیئر کیتا تے آکھیا کہ اطلاع اے کہ اسرائیلی وزیر اعظم نیتن یاہو نے پاکستان دا خفیہ دورہ کیتا اے۔ نیتن یاہو نے اک ایسے ملک دا خفیہ دورہ کیتا اے جیہدے اسرائیل نال کوئی سفارتی تعلقات نہیں نیں۔
