اسلام آباد(پاکستان پوائنٹ نیوز27۔اکتوبر۔2018ء) سپریم کورٹ آف پاکستان نے ٹی وی چینلز اُتے بھارتی مواد وکھان اُتے پابندی لا دتی ۔ تفصیل مطابق سپریم کورٹ نے بھارتی مواد وکھان بارے ہائی کورٹ دا حکم معطل کر دتا۔ سنوائی دوران چیف جسٹس آف پاکستان جسٹس ثاقب نثار نے ریمارکس دتے کہ بند کرو ایہ بھارتی مواد۔ اوہناں نے آکھیا کہ کوئی ساڈے ڈیم بند کر وا رہیا اے تے اسیں اوہناں دے چینلز وی بند نہ کرئیے؟جیہدے مگروں چیف جسٹس نے بھارتی مواد وکھان اُتے پابندی لان دا حکم جاری کر دتا۔
یاد رہوے کہ ایس توں پہلاں پاکستانی فلم پروڈیوسرز ایسوسی ایشن نے بھارتی فلماں دی نمائش اُتے پابندی لان دی منگ کیتی سی۔ پاکستانی فلم پروڈیوسرز ایسوسی ایشن دے سینئر عہدیدار اعجاز چوہان دھری نے آکھیا سی کہ جدوں بھارت وچ پاکستانی فلماں دی نمائش نہیں کیتی جاندی تے بھارتی فلماں نوں پاکستان وچ کیوں وکھایا جائے، سانوں ایس بارے سنجیدگی نال سوچنا پئے گا۔اوہناں دا آکھنا سی کہ بھاویں ساڈے ڈسٹریبیوٹرز تے نمائش کرن والے بھارتی فلماں دی نمائش توں پیسے کما رہے نیں پر آن والے ویلے نوں ایہ ساڈی صنعت دی ترقی لئی نقصان دا کارن ہوئے گا۔
