حکومت نے وی نواز شریف دی تعریف کر دتی

نواز شریف دور دی یوتھ لون سکیم بغیر تبدیلی جاری رکھن دا فیصلا کر لیا

حکومت نے وی نواز شریف دی تعریف کر دتی
 نواز شریف دور دی یوتھ لون سکیم بغیر تبدیلی جاری رکھن دا فیصلا کر لیا

اسلام آباد(پاکستان پوائنٹ نیوز27۔اکتوبر۔2018ء) موجودہ حکومتی جماعت پاکستان تحریک انصاف نے پچھلیاں حکومتاں نوں اوہناں دے منصوبے تے پراجیکٹس اُتے سخت تنقید دا نشانہ بنایا پر حکومت وچ آن مگروں پاکستان تحریک انصاف نے نواز شریف دور دی اک سکیم جاری رکھن دا فیصلا کر لیا اے۔ تفصیل مطابق پاکستان تحریک انصاف نے نواز شریف دور دی یوتھ لون سکیم نوں بغیر کسے تبدیلی دے جاری رکھن دا فیصلا کرلیا اے۔

حکومت نے سابق وزیر اعظم نواز شریف دے دور وچ شروع کیتی گئی یوتھ لون سکیم بغیر تبدیلی دے منظور کرلی اے۔ وسیلیاں نے دسیا کہ سابق وزیر اعظم نواز شریف دی حکومت نے 2014وچ نوجواناں نوں آسان شرطاں اُتے ون ونڈو آپریشن توں قرضہ دین دی سکیم شروع کیتی سی۔ نویں حکومت دی پالیسی دے مطابق وی یوتھ سکیم راہیں تعلیم یافتہ نوجوان کاروبار لئی 20لکھ رُپئے تک قرضہ لے سکدے نیں۔

موجودہ حکومت نے ایس سکیم نوں جاری رکھدے ہوئے شرطاں تے طریقہ کار وی سابقہ حکومت دا طے کردہ ای اپنایا اے۔وسیلیاں مطابق پاکستان تحریک انصاف دی حکومت نے یوتھ لون سکیم دا جائزہ لِتے بغیر ای ماہرین دی رائے نال اوہنوں جاری رکھن دا فیصلا کیتا اے۔وفاقی حکومت نے وزیر اعظم یوتھ لون سکیم دا چیئرمین عثمان ڈار نوں تعینات کیتا سی۔ ایس حوالے نال عثمان ڈار دا کہنا اے کہ وزیر اعظم یوتھ لون سکیم بہترین سکیم اے جو بے روزگاری دے حل وچ مدد گار ثابت ہوئے گی تے ایس سکیم دے تحت چار سال وچ 11لکھ نوجوان مستفید ہون گے۔