اسلام آباد(پاکستان پوائنٹ نیوز25۔اکتوبر۔2018ء) قرآن پاک دے ذریعے کینسر سنے ہور خطرناک بیماریاں دا اعلاج ممکن اے۔ اک میڈیا رپورٹ وچ دسیا گیااے کہ بہاولپور دے اک نِکے قصبے توں تعلق رکھن والے پیر عثمان غنی ہن تیکر دنیا بھر وچ لکھاں بندیاں دا روحانی علاج کر چکے نیں جو بالکل کامیاب اے۔ عثمان غنی نے قرآن تھراپی نوں دنیا بھر وچ متعارف کروایا۔
اوہناں د ا آکھنا سی کہ اوہناں نوں 32سال پہلاں اک مجذوب ولوں قران پاک راہیں علاج دا طریقہ کار عطا کیتا گیا سی۔ جیہدے مگروں ہن تیکر اوہ خطرناک بیماریاں وچ ملوث لکھاں بندیاں دا علاج قرآن پاک راہیں کر چکے نیں۔ عثمان غنی نے دسیا کہ قرآن تھراپی یاں قرآن ہیلنگ راہیں نہ صرف پاکستان بلکہ مشرق وسطی،یورپ، امریکا تے ترکی سنے کئی ملکاں وچ بندیاں دا علاج کر چکے آں۔
ایہ طریقہ بہت سادہ تے مکمل طور اُتے مفت اے۔ قرآن پاک دا دم کروان والے بندیاں نوں صرف 5رُپئے چندہ کسے وی مسجد وچ دینا پیندا اے جدکہ غیر مسلماں نوں ایہ رقم اپنی عبادت گاہواں وچ دین دی اجازت دتی گئی اے۔ دنیا بھر وچ عثمان غنی دے 25ہزار توں ودھ شاگرد نیں جیہناں وچوں بہتے بندے اوہ نیں جو ایس توں پہلاں آپ کینسر یاں کسے ہور خطرناک بیماری دا شکار رہ چکے سن تے قرآن تھراپی دے ذریعے تندرست ہون مگروں اوہناں نے اپنیاں خدمتاں روحانی طریقے نال علاج کرن لئی وقف کیتیاں۔
