اسلام آباد(پاکستان پوائنٹ نیوز25۔اکتوبر۔2018ء) قومی احتساب بیورو(نیب) نے ایل این جی سکینڈل فیر کھولن دا فیصلا کیتا اے۔ تفصیل مطابق نیب نے ایل این جی سکینڈل نوں فیر کھولن دا تے سکینڈل وچ سابق وزیر اعظم شاہد خاقان عباسی نوں سدن دا فیصلا کیتا اے۔ نیب نے ایس حوالے نال اپنیاں تحقیقات شروع کر دے ہوئے اہم ثبوت وی اکٹھے کر نے شروع کر دتے نیں۔ ایس حوالے نال نیب راولپنڈی نے متعلقہ وزارتاں کولوں ریکارڈ لین لئی خط لکھ دتے نیں۔
ایس توں وکھ یاد رہوے کہ پچھلے دیہاڑے خبر ساہمنے آئی سی کہ خواجا آصف خلاف منی لانڈرنگ دیاں تحقیقات دے سلسلے وچ سٹیٹ بنک نوں خط لکھیا گیا اے۔ نیب نے سٹیٹ بنک کولوں خواجا آصف دے بطور وزیر دورانیے دیاں ساریاں تفصیلاں منگیاں نیں۔ نیب نے خواجا آصف ولوں کیتی گئی ٹرانزیکشن دیاں ساریاں تفصیلاں دے نال نال اوہناں دی گھر والی تے بالاں دی ٹرانزیکشن دیاں تفصیلاں وی منگیاں نیں۔
ایس توں وکھ بنکاں دے قرضے تے باہرلے ملک گھلے گئے پیسیاں دیاں تفصیلاں وی منگیاں گئیاں نیں۔یاد رہوے کہ 17اکتوبر نوں ہون والے قومی اسمبلی دے اجلا س وچ اپوزیشن لیڈر قومی اسمبلی و مسلم لیگ (ن) دے صدر شہباز شریف نے خطاب کردے ہوئے آکھیا سی کہ مینوں نیب نے آکھیا کہ خواجا آصف خلاف گواہی دیو۔ میں آکھیا کہ تُسیں مینوں وعدہ معاف گواہ بنن لئی سدیا اے؟خواجا آصف خلاف گواہی دی گل اُتے میں آکھیاکہ زبان سنبھال لوو۔
نیب نوں آکھیا کہ تہانوں خیال نہیں آؤندا ایہ بہت شرمناک گل اے۔ رپورٹ ملدی سی کہ نیب اندر میرے خلاف وعدہ معاف گواہ بنائے جا رہے نیں۔ نیب والے ہر کسے نوں آکھدے نیں کہ شہباز شریف خلاف گواہی دیو گے تے تہانوں چنگی نوکری دیواں گے۔ افسراں نوں آکھیا جاندا سی کہ شہباز شریف خلاف وعدہ معاف گواہ بن جاؤ تہانوں چیف سیکرٹری بنا دیواں گے، ایس گل دا یقین مینوں اودوں ہویا جدوں مینوں آپ وعدہ معاف گواہ بنن لئی آکھیا گیا۔
