لاہور(پاکستان پوائنٹ نیوز25۔اکتوبر۔2018ء) افغان سفیر عمر زخیل وال دا پی آئی اے دی اُڈان وچوں بیگ گواچ گیا، افغانی سفیر نے پی آئی اے دی بدانتظامی اُتے سوال چُک دتے۔ میڈیا رپورٹس مطابق قومی ائر لائن دی بدانتظامی دی وجہ توں افغان سفیر عمر زخیل دا قیمتی سامان گواچ گیا اے۔ دسیا گیا اے کہ افغان سفیر دا سامان پی آئی اے دی کابل توں اسلام آباد جان والی اُڈان دی بجائے یو کے اپڑ گیا اے۔
جیہدے اُتے افغان سفیر نے سماجی رابطے دی ویب سائٹ اُتے ٹویٹ کردے ہوئے پی آئی اے توں شکوہ کیتا تے آکھیا کہ پی آئی اے دی اُڈان وچوں دوجی وار میرا سوٹ بیگ لاپتا ہویا اے۔ میں ایہنوں پی آئی اے دی بدانتظامی آکھاں یاں فیر ایہنوں اتفاقیہ واقعہ سمجھ لواں۔ اوہناں نے آکھیا کہ ایہ میرے نال اک ہفتے وچ دوجا واقعہ پیش آیا ے کہ میرا سامان پی آئی اے دی اُڈان راہیں کابل توں یوکے اپڑ گیا اے۔
یاد رہوے کہ ایس توں پہلاں پورے پاکستان دا سِر اوس ویلے شرم نال جُھک گیا سی جدوں اک گریڈ 20دے افسر ضرار حیدر نے کویتی وفد دا پرس چوری کر لیا سی۔ چوری دے واقعے مگروں اک ویڈیو وی ساہمنے آگئی سی جیہدے وچ سینئر افسر نوں کویتی وفد دا پرس چوری کردے ہوئے ویکھیا گیا سی۔ کویت دے اک مشہور اخبار نے ایس سینئر افسر دی خبر دے نال نال فوٹو وی چھاپی۔ جیہدی وجہ توں پوری قوم دا سر شرم نال جُھکیا۔
