اسلام آباد(پاکستان پوائنٹ نیوز25۔اکتوبر۔2018ء) وزیر اعظم عمران خان نے اج گلاس مینوفیکچرنگ کمپلیکس دا افتتاح کر دتا اے۔ اوہناں نے آکھیا کہ چین توں جدید ٹیکنالوجی پاکستان منتقل کراں گے، لوکاں نوں کاروبار دے موقعے دیواں گے، کاروبار کرنا جِنا آسان ہوئے گا اونی ای سرمایہ کاری بُہتی ہوئے گی تے بے روزگاری ختم ہوئے گی، چین نال 50لکھ گھراں دی سرمایہ کاری لئی وی گل کراں گے۔
اوہناں نے اج گلاس مینوفیکچرنگ کمپلیکس دی افتتاحی تقریب نال خطاب کردے ہوئے آکھیا کہ پاکستان وچ جِنا بُہتا کاروبار کرنا آسان ہوئے گا اونی ای سرمایہ کاری ودھے گی تے معاشی ترقی ہوئے گی ،روزگار ودھے گا۔اوہناں نے آکھیا کہ اسیں انوسٹمنٹ لئی آن والیاں اوکڑاں نوں دور کر دتا اے۔ وزیر اعظم دا آکھنا سی کہ آن والے دناں نوں چائنہ جا رہے آں، چائنہ نوں سی پیک وچ پارٹنر شپ بنانا چاہندے آں۔ جیویں جیویں ساڈا چائنہ نال ٹریڈ دا رشتہ ودھے گا تے پاکستان انشااللہ ترقی کرے گا۔ لوک نوکریاں لئی پاکستان واپس آن گے۔وزیراعظم عمران خان دا خطاب دوران آکھنا سی کہ ہاؤسنگ دے معاملے اُتے چائنہ نال گل بات ہوئے گی۔ ایہ ساڈا وڈا پروجیکٹ اے۔ اسیں اوہدے لئی وی انویسٹر لے کے آواں گے۔
