وزیراعظم عمران خان نے یمن جنگ وچ ثالث بنن دا اعلان کر دتا

یمن وچ جاری جنگ نال مسلم دنیا بڑی دُکھ وچ اے، اسیں یمن جنگ دا حصہ بنن دی بجائے اوہنوں ختم کرن لئی اقدامات کراں گے:عمران خان

وزیراعظم عمران خان نے یمن جنگ وچ ثالث بنن دا اعلان کر دتا
یمن وچ جاری جنگ نال مسلم دنیا بڑی دُکھ وچ اے، اسیں یمن جنگ دا حصہ بنن دی بجائے اوہنوں ختم کرن لئی اقدامات کراں گے:عمران خان

اسلام آباد(پاکستان پوائنٹ نیوز24۔اکتوبر۔2018ء) وزیراعظم عمران خان نے یمن جنگ وچ ثالث بنن دا اعلان کر دے ہوئے آکھیا کہ یمن وچ جاری جنگ نال مسلم دنیا بڑی دُکھ وچ اے، اسیں یمن جنگ دا حصہ بنن دی بجائے اوہنوں ختم کرن لئی اقدامات کراں گے۔ تفصیل مطابق پاکستان تے سعودی عرب وچکار بھراواں وانگ تعلقات نیں۔ سعودی عرب نے ہر اوکھے ویلے وچ پاکستان دا ساتھ دتا اے۔

پاکستان تے سعودی عرب دے تعلقات مثال نیں پر کُجھ چِر توں سعودی حکام دا جھکاء پاکستان ول نہیں سی۔پر وزیر اعظم ہن دوجی وار کل سعودی عرب دے دورے اُتے گئے۔ جتھے اوہناں نے اپنے دو دناں دے دورے دوران وڈیاں کامیابیاں حاصل کیتیاں۔ وزیر اعظم عمران خان تے سعودی فرمانروا شاہ سلمان وچکار ہون والی ملاقات مگروں سرکاری اعلامیہ جاری کیتا گیا۔ وزیر اعظم سعودی عرب نال تن سالہ مدت دے کئی سمجھوتے کرن وچ کامیاب ہوگئے۔

پاکستان تے سعودی عرب وچکار تن سال د ی مدت لئی کئی اقتصادی سمجھوتے ہوئے۔ سعودی عرب نے پاکستان دے اکاؤنٹس وچ تن ارب ڈالر رکھن دا فیصلا کیتا۔ایس توں وکھ سعودی عرب نے پاکستان نوں اک سال لئی 3ارب ڈالر دا تیل اُدھار دین دا فیصلا کیتا اے۔ وزیر اعظم پاکستان اُتے ہون والیاں ایہناں مہربانیاں نوں شک دی نظر نال ویکھیا جا رہیا اے۔ تجزیہ کاراں دا خیال سی کہ وزیر اعظم نے کسے وڈی ڈیل دے تحت سعودی عرب کولوں ایہ رعایت لئی اے۔

ایہ وی آکھیا جا رہیا سی کہ شاید پاکستان یمن جنگ وچ حصہ بنن دی شرط اُتے سعودی عرب ولوں رعایت لے رہیا اے۔ پر ایس حوالے نال وزیراعظم نے سارے خدشیاں نوں دور کیتا۔ وزیر اعظم نے قوم نوں اعتماد وچ لیندے ہوئے یمن جنگ دے حوالے نال اپنا موقف واضح کیتا۔ وزیر اعظم عمران خان دا آکھنا سی کہ میں ایہ گل واضح کر دیواں کہ پاکستان یمن جنگ دا حصہ نہیں بنے گا۔ اوہناں نے آکھیا کہ یمن وچ جاری جنگ نال مسلم دنیا بڑی دُکھ وچ اے۔ اسیں یمن جنگ دا حصہ بنن دی بجائے اوہنوں ختم کرن لئی اقدامات کراں گے۔